قولدى ءجيى جۋۋ، رەسپيراتورلىق گيگيەنا – بۇل جوتەلگەندە جانە تۇشكىرگەندە اۋىز بەن مۇرىندى مايلىقپەن جابۋ، ادام كوپ جينالاتىن ورىندارعا بارۋدى شەكتەۋ جرۆي جانە تۇماۋ جۇقتىرۋ ءقاۋپىن ازايتۋعا كومەكتەسەدى.
بۇل تۋرالى وكق بريفينگىندە الماتى قالاسىنىڭ №16 قالالىق ەمحاناسىنىڭ جالپى تاجىريبە دارىگەرلەرى ءبولىمىنىڭ مەڭگەرۋشىسى بايان تاكىبايەۆا ايتتى، دەپ حابارلايدى Almaty-akshamy.kz.
بايان ماۋلەن قىزىنىڭ ايتۋىنشا، اۋا تامشىلارى ارقىلى جۇعاتىن ءجىتى جۇقپالى اۋرۋلار ەتيولوگياسى بويىنشا ەرەكشەلەنەدى (300-دەن استام ۆيرۋس بەلگىلى).
نەگىزگى بەلگىلەرى:
· تەمپەراتۋراسى 38*س جانە ودان جوعارى بولسا ؛
· ءپۋلستىڭ جيىلىگى تەمپەراتۋرانىڭ ارتۋىنا سايكەس كەلەدى.
· تىنىس الۋ جيىلەيدى؛
· كاتارالدى بەلگىلەردىڭ ورتاشا بەلگىلەرى (مۇرىننىڭ اعۋى، قۇرعاق جوتەل)؛
· بەت مەن مويىننىڭ گيپەرەمياسى، قاتتى تەرلەۋ، ديففۋزدى گيپەرەميا جانە جۇتقىنشاقتىڭ شىرىشتى قاباتىنىڭ تۇيىرشىكتىلىگى؛
جرۆي اسقىنعان اعىمىنىڭ ءقاۋىپ توبىنا مىنالار جاتادى:
سوزىلمالى وكپە اۋرۋى بار كەز كەلگەن جاستاعى ادامدار (دەمىكپە، ءوسوا جانە ت.ب.)؛
سوزىلمالى جۇرەك اۋرۋى بار كەز كەلگەن جاستاعى ادامدار؛
زات الماسۋ بۇزىلۋلارى بار ادامدار (قانت ديابەتى، سەمىزدىك)؛
سوزىلمالى بۇيرەك اۋرۋى، سوزىلمالى گەپاتيتى، نيەۆرولوگيالىق جاعدايى، گەموگلوبينوپاتياسى جانە يممۋنوسۋپرەسسياسى بار ادامدار؛
65 جاستان اسقان ادامدار.
بايان تاكىبايەۆا ەكپە الماعاندارعا بەتپەردە كيىپ، اراقاشىقتىقتى ساقتاۋعا، ادام كوپ جينالاتىن جەرلەردەن اۋلاق بولۋعا كەڭەس بەرەدى. سونىمەن قاتار، ۇيدە ميكروبتاردىڭ كوبەيۋىنە جول بەرمەيتىن ىلعالدى تازالىقتى ءجيى جۇرگىزۋ كەرەك.
دارىگەر ۇيدە دارى-دارىمەكسىز قالاي ەمدەلۋگە بولاتىنىن ايتتى:
ينتوكسيكاسيا بەلگىلەرى بولعان جاعدايدا توسەكتە جاتىپ، دەمالعان دۇرىس.
ديەتا – تەز سىڭىرىلەتىن تاعامدار جانە شاي، جەمىس-كوكونىس شىرىندارى، جەمىس سۋسىندارى، اۋىز سۋ تۇرىندە تاۋلىگىنە دەنە سالماعىنا 20-40 مل/كگ مولشەرىندە سۇيىقتىقتى كوپ تۇتىنۋ.
جۋرناليستەردىڭ سۇراقتارىنا جاۋاپ بەرگەن دارىگەر دەنە قىزۋى كوتەرىلگەندە، بىردەن جەدەل جاردەم شاقىرتۋدىڭ قاجەت ەمەستىگىن ايتتى.
«دەنە تەمپەراتۋراسىن 38 * C دەيىن كوتەرىلگەن جاعدايدا ءتۇسىرۋ ۇسىنىلمايدى، سەبەبى بۇل ورگانيزمنىڭ ينفەكسيالىق اگرەسسورعا قورعانىس رەاكسياسى. دەنە تەمپەراتۋراسىنىڭ جوعارىلاۋىنان پاتوگەندىك باكتەريالار مەن ۆيرۋستار ولەدى، ءبىراق ءاربىر ورگانيزم جەكە. بىرەۋ اياقتا ءجۇرىپ، 37-38 گرادۋس تەمپەراتۋراعا شىداي الادى جانە دەنە قىزۋىن ءتىپتى بايقامايدى دا ونى تۇسىرۋگە اسىقپايدى، بۇل اعزانىڭ كۇرەسۋىنە مۇمكىندىك بەرەدى، ال ەندى بىرەۋ قىزۋ تۇسىرەتىن ءدارىسىز جۇرە المايدى. جوعارى تەمپەراتۋرانى ءوز بەتىنشە تۇسىرۋگە بولادى - مۇنى ىستەۋ ءۇشىن ماڭدايعا سالقىن كومپرەسس جاساپ، ونى شامامەن 30 مينۋت ۇستاپ، قىزۋدى باساتىن ءدارىنى قابىلداۋ كەرەك. ەڭ سەنىمدى دارىلەردىڭ ءبىرى – پاراسەتامول، يبۋپروفەن»، – دەيدى بايان تاكىبايەۆا.
ەگەر دەنە تەمپەراتۋراسى 38،5 گرادۋستان جوعارى بولسا، ودنا ونى مىندەتتى تۇردە قىزۋدى تۇسىرەتىن پرەپاراتتارمەن ءتۇسىرۋ كەرەك، ويتكەنى ول تىرىسپا، جۇرەككە كۇش ءتۇسۋ جانە قان اينالىمى جەتكىلىكسىزدىگى، ەستەن تانۋ، ميدىڭ ءىسىنۋى سىندى اسقىنۋلاردى تۋدىرۋى مۇمكىن.
دارىگەر جرۆي-نىڭ الدىن الۋدىڭ نەگىزگى جانە ءتيىمدى دالەلدەنگەن ءادىسى ماۋسىمدىق ۆاكسيناسيا ەكەنىن اتاپ ءوتتى.