دەپۋتات دابىل قاقتى.
سەناتور بيبىگۇل جەكسەنباي قىزىلشاعا قارسى ەكپە ماسەلەسىنە توقتالىپ، ءدىني سەنىمىن سىلتاۋراتقان باس تارتۋشىلارمەن جۇمىس ىستەلمەيتىنىن ايتتى، دەپ حابارلايدى Almaty-akshamy.kz
قازاقستان قىزىلشا اۋرۋى بويىنشا ەفيوپيا، پاكىستان، كونگو ەلدەرىن باسىپ وزىپ، يەمەن جانە ۇندىستانمەن تەڭەستى. بيبىگۇل جەكسەنباي قازاقستاندا ۆاكسيناسيا ماسەلەسى بىردەن تۋىنداعان جوق دەپ ەسەپتەيدى. مامانداردىڭ ايتۋىنشا، مۇنىڭ باستى سەبەپتەرىنىڭ ءبىرى – اتا-انالاردىڭ بارلىعى بىردەي ەكپەنىڭ ماڭىزىن تۇسىنە بەرمەۋىندە.
"شالعايداعى جانە اۋىلدى ەلدى مەكەندەردە مەديسينا كادرلارى مەن قۇرال-جابدىقتاردىڭ جەتىسپەۋى دە بالالاردى ۋاقىتىلى ەگۋدى قيىنداتادى. سونىمەن قاتار ءبىراز وڭىردە ۆاكسيناعا قولجەتىمدىلىك پەن ەگۋ قىزمەتىنىڭ ساپاسىنا بايلانىستى ماسەلەلەر بار. سونىمەن قاتار ءدىني نانىم-سەنىمدەرىن العا تارتىپ، باس تارتاتىندارمەن دە جۇمىس ىستەلمەيدى. ەكپە دەڭگەيى تۋرالى ەسەپتەردىڭ سەنىمىنە كۇمانداناتىندار كوپ. ءبىز قازاقستاننىڭ سيفرلاندىرۋدا العا جىلجىعانىن ماقتان ەتەمىز، ءبىراق ۆاكسيناسيا دەرەكتەرى نەگە ءالى كۇنگە دەيىن قاعاز داپتەرگە جازىلاتىنى تۇسىنىكسىز"، دەدى بيبىگۇل جەكسەنباي.
سونىمەن قاتار دەپۋتات كەيبىر الەۋمەتتىك-ەكونوميكالىق توپتاردىڭ ۆاكسيناسيامەن قامتىلۋ دەڭگەيىنىڭ تومەندىگىنە توقتالىپ، ۆاكسيناسيا دەڭگەيى تۋرالى بەرىلگەن ەسەپتەردىڭ دۇرىستىعىنا كۇمان كەلتىردى. ۇكىمەتتىڭ بۇل ماسەلەنى شەشۋگە جىلدار بويى سالعىرت قاراعانىنا اشۋلانعان سەناتور جاعدايدى رەتتەۋگە باعىتتالعان ءبىرقاتار ۇسىنىسىن ايتتى.
"بىرىنشىدەن، جاعدايدى جاقسارتۋ ءۇشىن ۆاكسيناسيانىڭ ماڭىزى مەن قاۋىپسىزدىگى تۋرالى اتا-انالار اراسىندا اقپاراتتىق جۇمىستى كۇشەيتۋ قاجەت. ەكىنشىدەن، ەلىمىزدىڭ بارلىق ايماعىندا ساپالى ۆاكسينالار مەن مەديسينا قىزمەتتەرىنە كەدەرگىسىز قولجەتىمدىلىكتى قامتاماسىز ەتەتىن ارنايى ءموبيلدى مەديسينا بريگادالارىن ۇيىمداستىرۋ قاجەت. ۇشىنشىدەن، ساپاسى مەن جارامدى مەرزىمى ءوتىپ كەتكەن دارىلەردىڭ، ۆاكسينالاردىڭ جويىلۋىن قاداعالاۋدى كۇشەيتۋ كەرەك"، دەدى بيبىگۇل جەكسەنباي.
اقش-تىڭ اۋرۋلاردى باقىلاۋ جانە الدىن الۋ ورتالىقتارى (CDC) الەمدەگى قىزىلشا ىندەتى تۋرالى مالىمەتتەردى جاريالادى. قازاقستان دەرتكە شالدىققاندار سانى بويىنشا العاشقى ۇشتىككە ەندى.