قازتاگ اقپارات اگەنتتىگىنىڭ حابارلاۋىنشا، سىبايلاس جەمقورلىققا قارسى ءىس-قيمىل اگەنتتىگى داۋرەن ابايەۆ مادەنيەت جانە سپورت ءمينيسترى بولىپ تۇرعان كەزدەگى زاڭ بۇزۋشىلىقتاردى تەكسەرە باستاعان، دەپ حابارلايدى Almaty-akshamy.kz.
«داۋرەن ابايەۆ مينيستر بولىپ تۇرعان كەزدەگى زاڭسىزدىقتارعا انتيكور نازار اۋدارا باستادى. ءقازىر تەكسەرۋ ءجۇرىپ جاتىر. 2022 جىلى وتكەن «ەۋرازيا» حالىقارالىق كينوفەستيۆالىنە قاتىستى»، – دەگەن اقپارات كوزى.
كينوفەستيۆال وتكىزۋدەگى زاڭسىزدىقتار جونىندەگى رەداكسيا ساۋالىنا انتيكوردىڭ سوتقا دەيىنگى تەرگەۋ قىزمەتىنىڭ جەتەكشىسى قانات سۇلەيمەنوۆ بىلاي دەپ قىسقا جاۋاپ قايتارىپتى:
«سىبايلاس جەمقورلىققا قارسى ءىس-قيمىل اگەنتتىگىندە ق ر مادەنيەت جانە سپورت مينيسترلىگىنىڭ لاۋازىمدى تۇلعالارىنا قاتىستى قىلمىستىق ءىس تەرگەلىپ جاتىر»
ەستەرىڭىزگە سالايىق، «ەسكى قازاقستاننىڭ» بەلسەندى وكىلدەرىنىڭ ءبىرى داۋرەن ابايەۆ 2022 جىلدىڭ قاڭتارىنان 2023 جىلدىڭ قاڭتارىنا دەيىن مادەنيەت جانە سپورت ءمينيسترى قىزمەتىن اتقاردى. بيىلعى جىلدىڭ ناۋىرىزىنان باستاپ تمد باس حاتشىسىنىڭ ورىنباسارى لاۋازىمىندا. ءقازىر د.ابايەۆ قىزمەت بابىنا بايلانىستى بەلارۋس استاناسى مينسكىدە تۇرادى.
ەگەر د.ابايەۆتىڭ كەزىندە زاڭ بۇزۋشىلىقتار جاسالعانى دالەلدەنسە، ابايەۆتىڭ ءوزى قىلمىستىق جاۋاپكەرشىلىككە تارتىلا ما؟ بۇل ماسەلەگە قاتىستى ابايەۆتىڭ ءوزى نە دەر ەكەن؟..