ارمان تىلەۋكەنوۆ حابارلاعانداي، الەۋمەتتىك جەلىلەردە "QazaqGaz" اق قىزمەتكەرلەرى مەن باسشىلىعىن سىبايلاس جەمقورلىققا قارسى قىزمەت ۇستاعانى تۋرالى اقپارات پايدا بولدى. انتيكور سپيكەرى بۇل اقپارات مۇلدە دۇرىس ەمەس ەكەنىن اتاپ ءوتتى: دەپارتامەنت تەرگەۋ جۇرگىزىپ جاتىر، ءبىراق ءالى ەشكىم ۇستالعان جوق.
"ۆەدومستۆولىق باعىنىستى ۇيىمداردىڭ قىزمەتكەرلەرىنىڭ وكىلەتتىگىن اسىرا پايدالانۋى مۇمكىن فاكتىسى بويىنشا سوتقا دەيىنگى تەرگەپ-تەكسەرۋ امالدارى جۇرگىزىلۋدە. ءىستىڭ ءمان-جايى بويىنشا تەرگەۋدىڭ وبەكتيۆتىلىگى مەن جان-جاقتىلىعىن قامتاماسىز ەتۋ ماقساتىندا جەدەل-ىزدەستىرۋ شارالارى جۇرگىزىلدى. بۇل ءىس بويىنشا ەشكىم ۇستالعان جوق. قازىرگى ۋاقىتتا ەشكىمگە ايىپ تاعىلعان جوق"، -دەدى ارمان تىلەۋكەنوۆ
انتيكوردىڭ رەسمي وكىلىنىڭ ايتۋىنشا، تەرگەۋ مۇددەسىنە ساي باسقا اقپارات جاريا ەتىلمەيدى.
قازان ايىنىڭ سوڭىندا انتيكور بۇرىنعى ادىلەت ءمينيسترى مارات بەكەتايەۆتىڭ بيلىگىن اسىرا پايدالاندى دەگەن ايىپپەن ۇستالعانىن راستادى.