الماتىلىق ءتارتىپ ساقشىلارى كولىكتەردى تۇراققا قويۋ ەرەجەلەرىن بۇزۋ دەرەكتەرىن، سونداي-اق جابايى ساۋدا جاسايتىن ورىنداردى انىقتاۋ جۇمىستارىن جالعاستىرادى.
وسىعان بايلانىستى پاترۋلدىك مارشرۋتتار كۇشەيتىلىپ، قوعامدىق پوليسيا كومەكشىلەرىنەن قوسىمشا كۇشتەر تارتىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«بۇل ەڭ ءىرى قالا ءۇشىن پروبلەما ەكەنىن ءتۇسىنۋ ماڭىزدى جانە ءبىز ونى ورتاق كۇش-جىگەر ارقىلى، بىلايشا ايتقاندا، بىرلەسىپ شەشۋىمىز كەرەك. مۇنى ىستەۋ قيىن ەمەس ەكەنىنە سەنىمدىمىن. ونىڭ ۇستىنە، ءارقايسىمىز كۇن سايىن كوپتەگەن قۇقىق بۇزۋشىلىقتارعا كۋا بولامىز. ۇساق زاڭبۇزۋشىلىقتارعا كوز جۇمىپ قاراماي، بۇل تۋرالى “102” پۋلتىنە نەمەسە اقپاراتتىق-كوممۋنيكاسيالىق جۇيەلەر ارقىلى جەدەل حابارلاۋعا شاقىرامىز. قۇقىق بۇزۋشىلارعا دەرەۋ شارا قولدانىلاتىنىنا سەنىمدى تۇردە ايتا الامىن. كۇن سايىن قۇقىق بۇزۋشىلىقتار تۋرالى ونداعان ماڭىزدى سيگنالدار كەلىپ تۇسەدى»، – دەيدى جەتىسۋ اۋداندىق پوليسيا باسقارماسى باسشىسىنىڭ ءبىرىنشى ورىنباسارى دۋلات جاڭعابىلوۆ.
“قۇقىقتىق ءتارتىپ” ءىس-شاراسى اياسىندا وتكىزىلگەن ماقساتتى رەيدتەر قالاداعى جول جاعدايىن تۇراقتاندىرۋعا، جول-كولىك وقيعالارىن ازايتۋعا، جۇرگىزۋشىلەر اراسىنداعى ءتارتىپتى جاقسارتۋعا ىقپال ەتەدى. پوليسيا كۇشتەرى، سونداي-اق ءتيىستى جول بەلگىلەرىنىڭ قامتۋ ايماعىندا كولىك قۇرالىن قويۋعا ارنالماعان ورىنداردا تۇراققا قويۋ جاعدايلارىن انىقتاۋعا باعىتتالعان. ال، زاڭبۇزۋشىلىق انىقتالعان كەزدە كولىك يەلەرى ءوز كولىگىنىڭ قاسىندا بولماي قالسا، ولاردىڭ كولىكتەرى ەۆاكۋاتورلار ارقىلى مامانداندىرىلعان ايىپپۇل تۇراعىنا جەتكىزىلەدى.