بۇل تۋرالى اگەنتتىك ءتوراعاسى اسحات جۇماعالي مالىمدەدى.
6 ايدىڭ قورىتىندىسى بويىنشا القا وتىرىسىندا ول سىبايلاس جەمقورلىققا قارسى ءىس-قيمىل كەزىندە جەمقورلىق تاۋەكەلدەرىنىڭ كارتاسى قولدانىلاتىنىن ايتتى، دەپ حابارلايدى Almaty-akshamy.kz.
بۇل ادىسپەن ءبىلىم بەرۋ سالاسىندا سىرتقى تالداۋلار جۇرگىزىلىپ، جەمقورلىققا جاعداي جاسايتىن جۇيەلى پروبلەمالار بەلگىلەنگەن. سونىڭ ارقاسىندا سالاداعى تۇتاس قىلمىستىق سحەمالار اشىلدى. الماتى، شىمكەنت جانە تالدىقورعان قالالارىنىڭ، قىزىلوردا مەن اقتوبە وبلىستارىنىڭ ءبىلىم بەرۋ سالاسىنداعى لاۋازىمدى تۇلعالارىنا قاتىستى قىلمىستىق ىستەر تەرگەلىپ جاتىر. اگەنتتىكتىڭ دەرەگىنشە، مەكتەپ ديرەكتورلارى مەن ەسەپشىلەرى بيۋدجەت قاراجاتىن جىمقىرعان دەگەن كۇدىككە ءىلىندى.
ءقازىر ەل بويىنشا ءبىلىم بەرۋ سالاسىندا 102 قىلمىستىق ءىس تىركەلگەن. الدىن الا مالىمەتكە ساي شىعىن كولەمى 8 ملرد تەڭگەگە جۋىقتايدى. جالپى تالداۋ ناتيجەلەرىنە ساي ءارتۇرلى سالالاردا جەمقورلىق تاۋەكەلدەرىن جويۋ بويىنشا 1100-دەن استام ۇسىنىس ازىرلەندى. ولاردىڭ 33%-ىن مەملەكەتتىك ورگاندار ورىندادى.