پرەزيدەنت ءماجىلىس ءتوراعاسى ەرلان قوشانوۆتى قابىلدادى.
مەملەكەت باسشىسىنا پارلامەنتتىڭ تومەنگى پالاتاسىنىڭ VIII شاقىرىلىمىنىڭ I سەسسياسى اياسىنداعى قىزمەتى تۋرالى مالىمەت بەرىلدى، دەپ حابارلايدى Almaty-akshamy.kz اقورداعا سىلتەمە جاساپ.
سەسسيا باستالعاننان بەرى ماجىلىسمەندەردىڭ قاراۋىندا بولعان 82 زاڭ جوباسىنىڭ 20-نا دەپۋتاتتار باستاماشىلىق جاسادى.
ولاردىڭ ىشىندە زاڭسىز يەمدەنىلگەن اكتيۆتەردى قايتارۋ، ونلاين-پلاتفورمالار جانە ونلاين-جارناما، سەمەي يادرولىق قاۋىپسىزدىك ايماعى، سۇيىتىلعان گاز اينالىمى، ەلەكترلى ساموكاتتاردىڭ قوزعالىسىن رەتتەۋ تۋرالى جانە باسقا دا زاڭدار بار.
ءماجىلىس سپيكەرى كونستيتۋسيالىق رەفورمانىڭ قورىتىندىسى بويىنشا پالاتانىڭ جۇمىس فورماتىنا ەنگىزىلگەن وزگەرىستەر جونىندە ايتتى.
ءماجىلىستىڭ 6 پارتيالىق فراكسيادان، سونداي-اق ءبىر مانداتتى دەپۋتاتتاردان جاساقتالۋى زاڭ شىعارۋ جۇمىسىنىڭ اشىقتىعىن ارتتىرىپ، سايلاۋشىلارمەن كەرى بايلانىستى كۇشەيتتى.
ولار ۇكىمەت مۇشەلەرىنە جولداعان دەپۋتاتتىق ساۋالدارىندا ازاماتتاردىڭ وزەكتى ماسەلەلەرىن كوبىرەك كوتەرە باستادى.
وتكەن سەسسيا بارىسىندا العاش رەت جىلۋمەن قامتاماسىز ەتۋ سالاسىنداعى باسقارۋعا قاتىستى جوعارى اۋديتورلىق پالاتانىڭ ەسەبى تىڭدالدى جانە اتالعان سالادا كەشەندى پروبلەمالار بار ەكەنى انىقتالدى.
دەپۋتاتتار قوعامداعى، سونىڭ ىشىندە وڭىرلەرگە جاساعان ساپارلارى كەزىندە جيناقتاعان پروبلەمالار بويىنشا جاۋاپتى مينيسترلىكتەر باسشىلىعىنىڭ الدىنا ءبىرقاتار ناقتى ماسەلە قويدى.
جىلۋ ەلەكتر ورتالىقتارىن جانە جىلۋمەن قامتاماسىز ەتۋ جەلىلەرىن جاڭعىرتۋعا ەرەكشە نازار اۋدارىلدى.
قازىرگى تاڭدا ماجىلىسمەندەر وڭىرلەردە حالىقپەن كەزدەسۋلەر وتكىزىپ جاتىر.
ساپار بارىسىندا ءماجىلىستىڭ كەلەسى سەسسياسىندا قارالاتىن سۋ، بيۋدجەت، سالىق جانە قالا قۇرىلىسى كودەكستەرىنىڭ جوبالارى بويىنشاتالقىلاۋلار ۇيىمداستىرىلىپ، ۇسىنىستار جيناقتالادى.
سونىمەن قاتار ەرلان قوشانوۆ پارلامەنتتىك ديپلوماتيا اياسىندا اتقارىلعان جۇمىستاردىڭ قورىتىندىسى تۋرالى ايتتى.
سەسسيا باستالعاننان بەرى ازەربايجان، بەلارۋس، قىرعىزستان، رەسەي، تۇركيا، وزبەكستان پارلامەنتتەرىنىڭ باسشىلارىمەن جانە باسقا دا ەلدەردىڭ زاڭ شىعارۋشى ورگاندارىنىڭ وكىلدەرىمەن كەزدەسۋلەر وتكىزىلگەن.