كينوفەستيۆال 6-10 قىركۇيەك ارالىعىندا وتەدى.
فەستيۆال باعدارلاماسى قىزىقتى شارالارعا تولى - كينو كورسەتىلىمدەرمەن قاتار، جەكە انيماسيالىق كينوفەستيۆال، شەبەرحانالار، ۆوركشوپتار، تانىمال رەجيسسەرلەر مەن اكتەرلەردىڭ دارىستەرى، سونداي-اق كينويندۋستريانىڭ وزەكتى ماسەلەلەرى بويىنشا دوڭگەلەك ۇستەلدەر وتەدى، دەپ حابارلايدى Almaty-akshamy.kz
فەستيۆالدىڭ باستى وقيعالارىنىڭ ءبىرى تمد ەلدەرىنىڭ كينوتانۋشىلارى مەن سىنشىلارىنىڭ II فورۋمىن وتكىزۋ بولماق، ونىڭ جۇمىسىنا 30-دان استام شەتەلدىك ماماندار قاتىسادى. فورۋم باعدارلاماسىندا - "كينوتانۋداعى زاماناۋي ۇردىستەر مەن سىن-قاتەرلەر: زەرتتەۋلەر، تالداۋ جانە پەرسپەكتيۆالار" تاقىرىبىنداعى پانەلدىك سەسسيا، جەتەكشى كينوتانۋشىلاردىڭ اۆتورلىق دارىستەرى مەن شەبەرلىك سىنىپتارى، فيلمدەردى كورۋ جانە ولاردى تالقىلاۋ. فورۋم سوڭىندا كينوتانۋشىلار مەن سىنشىلاردىڭ پىكىرىنشە فەستيۆالدىڭ ەڭ ۇزدىك ءفيلمى دە تاڭدالادى.
فورۋمعا ارمەنيا، ەستونيا، بەلارۋس، رەسەي، وزبەكستان، ءازىربايجان جانە باسقا دا كوپتەگەن ەلدەردىڭ ساراپشىلارى كەلەدى. ولاردىڭ ىشىندە:
- فيپرەسسي جانە نەتپاك مۇشەسى، كوپتەگەن حالىقارالىق كينوفەستيۆالدەردىڭ باعدارلامالىق ديرەكتورى جانە كەڭەسشىسى بولىپ تابىلاتىن قىرعىزستاننىڭ ەڭبەك سىڭىرگەن مادەنيەت قايراتكەرى گۋلبارا تولومۋشوۆا بار. ول 2018 جىلى BAIQONYR كينوفەستيۆالىنىڭ قازىلار القاسىن باسقارعان؛
- تاشكەنت ۆگيك ديرەكتورى، وزبەكستان كينەماتوگرافيا اگەنتتىگىنىڭ كوركەمدىك كەڭەسىنىڭ مۇشەسى ەلدار يۋلداشيەۆ؛
- "ماسكەۋ پرەمەراسى" حالىقارالىق كينوفەستيۆالىنىڭ باعدارلامالىق ديرەكتورى جانە "دوستاستىق" حالىقارالىق كينومەكتەبىنىڭ كۋراتورى (تبيليسي – باتۋمي)، فيپرەسسي مۇشەسى ەۆگەنيي مەيزەل؛
- "ورىك اعاشى" حالىقارالىق دەرەكتى فيلمدەر فەستيۆالىنىڭ باعدارلامالىق ديرەكتورى (ارمەنيا رەسپۋبليكاسى) ارتۋر ۆارديكيان؛
- تاللين DocPoint دەرەكتى فيلمدەر فەستيۆالىنىڭ ۇيىمداستىرۋشىسى تريستان پرييمياگي؛
- بەلارۋس ۇلتتىق عىلىم اكادەمياسىنىڭ بەلارۋس مادەنيەتىن، ءتىلىن جانە ادەبيەتىن زەرتتەۋ ورتالىعىنىڭ ەكراندىق ونەر ءبولىمىنىڭ اعا عىلىمي قىزمەتكەرى مارينا بەلووكايا؛
- "ماسكەۋ پرەمەراسى" حكف كوركەمدىك جەتەكشىسى جانە باس پروديۋسەرى ۆياچەسلاۆ شمىروۆ؛
- "كينو ۋاقىتى" كينوجوبالارىن قولداۋ جانە كينو ءىس-شارالارىن ۇيىمداستىرۋ ديرەكسياسى جانىنداعى كينوباعدارلامالاردىڭ كۋراتورى جانە كينو ءىس-شارالارىنىڭ تۇراقتى سپيكەرى (تاتارستان رەسپۋبليكاسى) اديليا حايبۋللينا؛
- ونەرتانۋ دوكتورى، وزبەكستان رەسپۋبليكاسى عىلىم اكادەمياسىنىڭ ونەرتانۋ ينستيتۋتىنىڭ "كينو جانە تەلەديدار " ءبولىمىنىڭ مەڭگەرۋشىسى نيگورا كاريموۆا؛
- "نيكا" رەسەي كينو ونەرى اكادەمياسىنىڭ اكادەميگى، چەبوكسار حالىقارالىق كينوفەستيۆالىنىڭ باعدارلامالىق ديرەكتورى جانە كوركەمدىك جەتەكشىسى سەرگەي لاۆرەنتيەۆ جانە تاعى باسقالار بار.
فورۋمنىڭ ءتوراعاسى – كينوتانۋشى، BAIQONYR كينوفەستيۆالىنىڭ باعدارلامالىق ديرەكتورى ەرجان جۇمابەكوۆ.
ەستەرىڭىزگە سالا كەتسەك، BAIQONYR حالىقارالىق كينوفەستيۆالى تمد-عا قاتىسۋشى مەملەكەتتەردىڭ مەملەكەتارالىق گۋمانيتارلىق ىنتىماقتاستىق قورىنىڭ قولداۋىمەن وتەدى.
فەستيۆال جاڭالىقتارىن baiqonyr.kz سايتىنان جانە ءبىزدىڭ Instagram جانە Facebook پاراقشالارىمىزدان – baiqonyrfilmfestival قاراي الاسىزدار (فورۋم جاڭالىقتارى - film_critics_forum ينستاگرام پاراقشاسىندا).