رەسپۋبليكالىق بيۋدجەتتەن 6 ملرد تەڭگەدەن استام قاراجات ءبولىندى.
«اڭساعان ءسابي» باعدارلاماسى اياسىندا 1 مىڭنان استام ءسابي دۇنيەگە كەلگەن. بۇل جايىندا شىمكەنتتەگى بەدەۋلىك پروبلەمالارىنا ارنالعان حالىقارالىق كونفەرەنسيادا دەنساۋلىق ساقتاۋ ءمينيسترى اجار عينيات ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ءمينيستردىڭ ايتۋىنشا، ەلىمىزدە جوعارى تەحنولوگيالىق كومەكتىڭ قولجەتىمدىلىگىن قامتاماسىز ەتۋدە ەكۇ باعدارلامالارىن مەملەكەتتىك قارجىلاندىرۋ ماڭىزدى ءرول اتقاردى.
2010 جىلدان بەرى 9 مىڭعا جۋىق باعدارلاما وتكىزىلدى، 3 مىڭنان استام بالا دۇنيەگە كەلگەن.
«بالالاردىڭ بولماۋىنا بايلانىستى نەكە بۇزىلاتىن جاعدايلار تۋىندايدى. 2020 جىلدىڭ 1 قىركۇيەگىندە مەملەكەت باسشىسى ۇكىمەتكە ەكۇ-عا كۆوتانى 7 ەسە ۇلعايتا وتىرىپ، «اڭساعان ءسابي» ارنايى باعدارلاماسىن ىسكە قوسۋدى تاپسىردى، وعان رەسپۋبليكالىق بيۋدجەتتەن 6 ملرد تەڭگەدەن استام قاراجات ءبولىندى. ونىڭ اياسىندا 3 مىڭنان استام ايەل جۇكتى بولىپ، 1 مىڭنان استام بالا دۇنيەگە كەلدى»، - دەپ اتاپ ءوتتى اجار عينيات.
ەسكە سالا كەتەيىك، بۇعان دەيىن اجار عينيات بەدەۋلىكتى ەمدەپ قانا قويماي، سەبەپتەرىمەن كۇرەسۋ قاجەتتىگىن ايتقان بولاتىن.