25 مىڭ تاپسىرىس راسىمدەلدى.
ەڭبەك مينيسترلىگىنىڭ ماماندارى الەۋمەتتىك قىزمەتتەر پورتالى ارقىلى الىنعان قىزمەت تۋرالى اقپارات بەردى، دەپ حابارلادى Almaty-akshamy.kz.
مامانداردىڭ ايتۋىنشا، جىل باسىنان بەرى الەۋمەتتىك قىزمەتتەر پورتالى ارقىلى شامامەن 85،5 مىڭ مۇگەدەكتىگى بار ادام وڭالتۋدىڭ تەحنيكالىق قۇرالدارىن، 7،1 مىڭى – ىمداۋ ءتىلى قىزمەتىن، 33،5 مىڭى – جەكە كومەكشىنىڭ قىزمەتىن العان. سونداي-اق، پورتال ارقىلى كەپىلدىك بەرىلگەن الەۋمەتتىك توپتامالارعا 25 مىڭ تاپسىرىس راسىمدەلگەن.
«پورتال مۇگەدەكتىگى بار ادامدارعا وڭالتۋدىڭ تەحنيكالىق قۇرالدارى مەن قىزمەتتەرىن ءوندىرۋشىنى جانە جەتكىزۋشىنى ءوز بەتىنشە تاڭداۋعا مۇمكىندىك بەرەدى. كومەك تۇرىنە تاپسىرىس بەرۋ كورسەتىلەتىن قىزمەتتى الۋشىنىڭ ەلەكتروندىق سيفرلىق قولتاڭباسىمەن راستاۋ ارقىلى جۇزەگە اسىرىلادى. تاپسىرىس بەرىلگەن وڭالتۋدىڭ تەحنيكالىق قۇرالدارىن جەتكىزۋ نەمەسە ءوز بەتىنشە اكەتۋ ارقىلى الۋعا بولادى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
مۇگەدەكتىگى بار ادامداردى وڭالتۋ قۇرالدارىمەن قامتاماسىز ەتۋ پروتەزدىك-ورتوپەديالىق، سۋردوتەحنيكالىق، تيفلوتەحنيكالىق جانە گيگيەنالىق قۇرالدار، سونداي-اق كرەسلو-اربالار بەرۋدى قامتيدى.
بۇگىنگى كۇنى پورتالدا ارناۋلى الەۋمەتتىك قىزمەتتەر كورسەتەتىن 816 مەديسينالىق-الەۋمەتتىك مەكەمە (بولىمشەلەر)، 200 وتق جەتكىزۋشى، 17 مىڭنان استام جەكە كومەكشى، 302 ىمداۋ ءتىلىن قىزمەتىن، 92 ساناتورلىق-كۋرورتتىق ەمدەۋدى، 146 كەپىلدىك بەرىلگەن الەۋمەتتىك توپتامانى جەتكىزۋشىلەر تىركەلگەن.
«الەۋمەتتىك قىزمەتتەر پورتالى» اۆتوماتتاندىرىلعان اقپاراتتىق جۇيەسىن ەنگىزۋ مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى ۇلتتىق جوسپار شەڭبەرىندە قاراستىرىلعان.
قولداۋعا ارنالعان بايلانىس ورتالىعىنا 1414 ءبىرىڭعاي نومىرىنە قوڭىراۋ شالىپ، ءتىلدى تاڭداۋ جانە 5 سانىن باسۋ ارقىلى پورتالدى پايدالانۋ بويىنشا كەڭەس الۋعا بولادى.