انالار كەڭەسى: مادەنيەتتى انا – مادەنيەتتى ۇلت

شارادا جىل بويى ەرەن ەڭبەگىمەن، مەيىرىمدى جۇرەگىمەن كوپتى ءتانتى ەتكەن انالار ماراپاتتالدى

بۇگىن الماتىدا قازاقستان حالقى اسسامبلەياسىنىڭ انالار كەڭەسىنىڭ كەڭەيتىلگەن وتىرىسى ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.

اۋقىمدى شاراعا ەلىمىزدىڭ ءار وڭىرىنەن كەلگەن 100-دەن اسا انا قاتىستى. ولار ەكى كۇن بويى قوعامداعى وزەكتى ماسەلەلەردى تالقىلادى. بۇل كەزدەسۋ انالارعا جاڭا سەرپىن بەرۋ ءۇشىن ۇيىمداستىرىلدى دەيدى قازاقستان حالقى اسسامبلەياسى ءتوراعاسىنىڭ ورىنباسارى مارات ءازىلحانوۆ. سوزىنشە، بيىل عانا تۇساۋى كەسىلگەن «مادەنيەتتى انا-مادەنيەتتى ۇلت» جوباسى - سونىڭ دالەلى. باستامانىڭ ماقساتى – وتباسىلىق قۇندىلىقتى دارىپتەپ، جاس ۇرپاقتى ۇلتتىق ءسالت-داستۇردى ساقتاۋ.

«وسى وڭىرلەردەگى انالار كەڭەسى جۇمىسىمەن تانىسىپ، جوبالاردى ورتاعا سالىپ، بارلىق ماسەلەنى تالقىلاۋ، ونىڭ باستى ماقساتى. انالار كەڭەسى جۇمىسىن ارمەن قاراي ىلگەلىرەتۋ بولىپ تابىلادى. مەن ويلايمىن، كەشەدەن بەرى جاقسى وتىرىستار بولعان شىعار دەيمىن. نەگىزى بىلەسىزدەر، وتباسى، انا، بالا مۇددەلەرى بارلىق وسى ماسەلەلەر مەملەكەت باسشىسىنىڭ اسا نازارىندا»، – دەدى  قازاقستان حالقى اسسامبلەياسى ءتوراعاسىنىڭ ورىنباسارى مارات ءازىلحانوۆ.

شارادا جىل بويى ەرەن ەڭبەگىمەن، مەيىرىمدى جۇرەگىمەن كوپتى ءتانتى ەتكەن انالار ماراپاتتالدى. ونىڭ قاتارىندا، جۇرتقا ۇلگى بولعان «ەل اناسى»، جاستارعا قول ۇشىن سوزىپ، پانا ەتكەن «ايالى الاقان» سەكىلدى نوميناسيالار تابىستالدى. ايتا كەتەيىك، بۇگىندە ەلىمىزدە 2 مىڭعا جۋىق انالار كەڭەسى بار. وندا 13 مىڭ انا جۇمىلدىرىلعان.