ساراپتاما بەلگىسىز زاتتىڭ سالماعى شامامەن 100 گرامم بولاتىن «گاشيش» ەسىرتكىسى ەكەنىن كورسەتتى
سولتۇستىك قازاقستان وبلىسىندا شەكاراشىلار ەلگە ەسىرتكى الىپ وتپەك بولعان رەسەي ازاماتىن ۇستادى، دەپ حابارلايدى Almaty-akshamy.kz.
ق ر ۇلتتىق قاۋىپسىزدىك كوميتەتى شەكارا قىزمەتى سقو بويىنشا دەپارتامەنتى باسپا ءسوز قىزمەتىنىڭ مالىمەتىنشە، وقيعا 6 قازان كۇنى ماعجان جۇمابايەۆ اۋدانىندا ورنالاسقان «قاراقوعا» اۆتوموبيل وتكىزۋ پۋنكتىندە بولعان. شەكارالىق باقىلاۋ بولىمشەسىنىڭ شەكارا ناريادى جولاۋشىلاردىڭ جۇكتەرىن تەكسەرگەن. رەسەي ازاماتى رۇقسات ەتىلمەگەن زاتتى كۇرتەشەسىنىڭ ىشكى قالتاسىنا جاسىرىپ، مەملەكەتتىك شەكارادان وتپەكشى ەكەن. الايدا جولى بولمادى. قىزمەتتىك يت ءيىستى الىپ، ەر ادامنان جاسىل ءتۇستى بەلگىسىز زات الىندى.
ساراپتاما بەلگىسىز زاتتىڭ سالماعى شامامەن 100 گرامم بولاتىن «گاشيش» ەسىرتكىسى ەكەنىن كورسەتتى. ءقازىر شەتەلدىككە قاتىستى تەرگەپ-تەكسەرۋ امالدارى جۇرگىزىلۋدە. ۇستالعان كۇدىكتى ماعجان جۇمابايەۆ اۋدانىنىڭ پوليسيا بولىمىنە تاپسىرىلدى.
بۇعان دەيىن استانا قالاسى پوليسيا دەپارتامەنتى ەسىرتكى بيزنەسىنە قارسى ءىس-قيمىل باسقارماسىنىڭ ءبولىم باسشىسى سەرگەي يلينىح ەسىرتكى ساقتاعانى ءۇشىن جاسوسپىرىمدەرگە قاتىستى 5 قىلمىستىق ءىستىڭ تىركەلگەنىن ايتقان ەدى.
پوليسەيدىڭ ايتۋىنشا، جاستار ەسىرتكى قىلمىسى 2015 جىلدان بەرى اسا اۋىر قىلمىس تۇرىنە جاتقىزىلعانىن بىلمەيدى.