قاراقات جاقسىلىق قىزى ابدەن – تانىمال قوعام قايراتكەرى
20 قاراشادا وتەتىن ق ر پرەزيدەنتىنىڭ كەزەكتەن تىس سايلاۋىنا قازاقستاننىڭ سايلاۋ تاريحىندا تۇڭعىش رەت ايەل ادام ۇسىنىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ايتا كەتەيىك، بۇگىن استانا قالاسى قونايەۆ كوشەسى 29/1 مەكەنجايىندا ورنالاسقان قازاقستان-شۆەيساريا-اقش كوللەدجىنىڭ بازاسىندا جۇمىس ىستەيتىن الەۋمەتتىك جۇمىسكەرلەر مەكتەبىندە «كاسىبي الەۋمەتتىك جۇمىسكەرلەر ۇلتتىق اليانسى» رەسپۋبليكالىق قوعامدىق بىرلەستىگىنىڭ جيىنى ءوتتى.
جيىن بارىسىندا «كاسىبي الەۋمەتتىك جۇمىسكەرلەر ۇلتتىق اليانسى» رەسپۋبليكالىق قوعامدىق بىرلەستىگىنىڭ الدىعا قويعان ماقسات-مىندەتتەرىن جۇزەگە اسىرۋ جولىندا جانە ۇلتتىق دەڭگەيدە الەۋمەتتىك ءالجۋاز توپتاردىڭ پروبلەمالارىن كوتەرىپ، ولاردىڭ مۇددەسىن قورعاۋ ماقساتىندا ق ر پرەزيدەنتىنىڭ كەزەكتەن تىس سايلاۋىنا قاراقات جاقسىلىق قىزى ابدەن ۇسىنىلدى.
قاراقات جاقسىلىق قىزى ابدەن – تانىمال قوعام قايراتكەرى، ق ر پرەزيدەنتى جانىنداعى ايەلدەر ىستەرى جانە وتباسى-دەموگرافيالىق ساياسات ۇلتتىق كوميسسياسىنىڭ مۇشەسى، استانا اكىمىنىڭ الەۋمەتتىك ماسەلەلەر جونىندەگى شتاتتان تىس كەڭەسشىسى، ەلوردانىڭ قوعامدىق كەڭەسىنىڭ مۇشەسى، 4 بالا تاربيەلەپ وتىر.
1974 جىلى اقمولا وبلىسىندا تۋعان. مەملەكەتتىك لاۋازىمداردا قىزمەت ەتكەن، سونىڭ ىشىندە سالىق كوميتەتى ورتالىق اپپاراتىندا، ق ر پرەزيدەنتى جانىنداعى مەملەكەتتىك باسقارۋ اكادەمياسىندا 10 جىلدان استام ۋاقىت قىزمەت ەتكەن.
استانا ءماسليحاتىنىڭ VI شاقىرىلىمىنىڭ دەپۋتاتى. بالالار ءۇيى مەن نارەستەلەر ءۇيىنىڭ قامقورشىلىق كەڭەسىنىڭ مۇشەسى، بالالار ءۇيىنىڭ 15 تالىمگەرىنىڭ مەنتورى، تاربيەشىسى.