الماتىداعى جامبىل اتىنداعى قازاق مەملەكەتتىك اكادەميالىق فيلارمونياسىنىڭ ۇلكەن زالىندا قازاقستاننىڭ مەملەكەتتىك جانە قوعام قايراتكەرى جەكسەمبەك ەركىمبەكوۆتىڭ 95 جىلدىعىنا ارنالعان سالتاناتتى كەش ءوتتى. بۇل شارانى قازاقستاننىڭ ەڭبەك سىڭىرگەن قايراتكەرى، كومپوزيتور جانە پيانيست سەرىك ەركىمبەكوۆ ءوزىنىڭ «وتانىم» اتتى اۆتورلىق كونسەرتىمەن بەلگىلەدى. بۇل تۋرالى Aqshamnews.kz سايتى حابارلايدى.
جەكسەمبەك ەركىمبەكوۆ 1966-1987 جىلدارى قازاقستاننىڭ مادەنيەت مينيسترلىگىندە باسشىلىق قىزمەتتەر اتقارىپ، 10 جىلدان استام ۋاقىت مينيستر بولعان. ونىڭ باسشىلىعى كەزىندە الماتى قالاسىندا 200-گە جۋىق مادەنيەت مەكەمەلەرى مەن عيماراتتار بوي كوتەرىپ، ەل مادەنيەتىنىڭ دامۋىنا ەرەكشە ۇلەس قوسىلدى.
كەشتە مەملەكەتتىك سيمفونيالىق وركەستر مەن ب.بايقاداموۆ اتىنداعى مەملەكەتتىك حور كاپەللاسى ديريجەرلەر قانات وماروۆ پەن بەيىمبەت دەمەۋوۆتىڭ جەتەكشىلىگىمەن ونەر كورسەتتى. سونداي-اق قازاقستاننىڭ ەڭبەك سىڭىرگەن قايراتكەرلەرى تالعات مۇسابايەۆ، مەيىر باينەش، «دارىن» مەملەكەتتىك سىيلىعىنىڭ لاۋرەاتى اسقار مۇقيات، پاريجدەگى حالىقارالىق بايقاۋدىڭ جەڭىمپازى نۇرگۇل ءنۇسىپجان جانە وزگە دە تالانتتى ونەرپازدار كونسەرتتىڭ كوركىن اشتى.
باعدارلاما بارىسىندا سەرىك ەركىمبەكوۆتىڭ «شاكارىم» سيمفونياسى، «ماڭگىلىك الاۋ» بالەتىنەن پرولوگ جانە وزگە دە شىعارمالارى ورىندالدى. كورەرمەندەر بۇل شىعارمالاردى جىلى قابىلداپ، فيلارمونيا ۇجىمىنىڭ ونەرىنە جوعارى باعا بەردى.
كومپوزيتور سەرىك ەركىمبەكوۆ ءوز سوزىندە بۇل كەشتىڭ ەرەكشە ماڭىزدىلىعىن اتاپ ءوتتى:
– «بۇل كونسەرت مەنىڭ اكەم – مەملەكەتتىك جانە قوعام قايراتكەرى جەكسەمبەك ەركىمبەكوۆتىڭ 95 جىلدىعىنا ارنالدى. اكەمنىڭ ەل مادەنيەتىن دامىتۋداعى ەڭبەگى ۇشان-تەڭىز. بۇگىنگى كونسەرتتە اكەمنىڭ زامانداستارى مەن ونەر سالاسىنداعى بەلگىلى تۇلعالار جينالدى. ءبىز بۇل شاراعا ءبىر جىلدان استام ۋاقىت دايىندالدىق جانە كورەرمەننىڭ ىستىق ىقىلاسىن سەزىندىك»، – دەدى ول.
تەاترتانۋشى جانە ونەرتانۋ كانديداتى امانگەلدى مۇقان جەكسەمبەك ەركىمبەكوۆتىڭ قازاق مادەنيەتىنە قوسقان ۇلەسىن ەرەكشە اتاپ ءوتتى:
– «جەكسەمبەك ەركىمبەكوۆ – قازاق مادەنيەتى مەن ونەرىنىڭ جاناشىرى. ول 80-90 جىلدارى رەسپۋبليكا سارايى، تەاترلار جانە وزگە دە مادەني نىسانداردىڭ سالىنۋىنا ەرەكشە ەڭبەك سىڭىرگەن تۇلعا. ونىڭ كاسىبي جانە ءداستۇرلى ونەردى دامىتۋداعى ۇلەسى ولشەۋسىز»، – دەدى ول.
كەشتە جەكسەمبەك ەركىمبەكوۆتىڭ زامانداستارى، وتباسى مۇشەلەرى مەن ارىپتەستەرى دە بولدى. ولاردىڭ قاتىسۋى قايراتكەردىڭ ەل تاريحىنداعى ماڭىزدىلىعىن تاعى دا ايقىنداي ءتۇستى. بۇل كەش جەكسەمبەك ەركىمبەكوۆتىڭ قازاق مادەنيەتىنىڭ دامۋىنا قوسقان سۇبەلى ۇلەسىن ەسكە سالىپ، ونىڭ ەسىمىن ونەر الەمىندە جاڭعىرتتى.