الماتىدا مۇمكىندىگى شەكتەۋلى، ەرەكشە كۇتىمدى قاجەت ەتەتىن بالالار تاربيەلەپ وتىرعان 100-دەن استام ايەل «ماما Pro» قوعامدىق قورىنىڭ قولداۋىمەن كاسىپكەرلىك سالاسىندا ءبىلىم الىپ شىقتى.
ءيا، دىمكاس بالا تاربيەلەۋ وڭاي ەمەس، ول ءۇشىن ءتوزىم، سابىر اۋاداي قاجەت. سونداي-اق، كۇيزەلىسكە ءتۇسىپ كەتپەي، ءوزىن-وزى دامىتىپ وتىرۋى كەرەك. مىنە، ولارعا وسى تۇرعىدا «ماما Pro» قوعامدىق قورى كومەككە كەلەدى. ەلىمىزدە 2018 جىلى نەگىزى قالانعان اتالمىش الەۋمەتتىك وسال توپقا جاتاتىن ايەلدەردى قولداۋ جانە دامىتۋ قورى مۇگەدەك بالالار تاربيەلەپ وتىرعان انالارعا كاسىپكەرلىك سالاسىنداعى زاماناۋي ءبىلىم الۋعا كومەكتەسەدى.
مۇمكىندىگى شەكتەۋلى بالالاردىڭ انالارى قور تاراپىنان بالادان قول ۇزبەي، بيزنەستى اشۋ جانە جۇرگىزۋ بويىنشا زاڭدىق، پسيحولوگيالىق جانە ارنايى كەڭەس الا الادى، سونىمەن قاتار ونلاين قاتىسۋعا دا مۇمكىندىگى بار. بالادان قول ۇزبەي دەپ وتىرعانىمىز، اتا-انالار ءتۇرلى كۋرسقا، سەمينارلارعا قاتىسىپ وتىرعاندا، بالالارىنا تاربيەشىلەر قارايدى. ياعني الاڭدامايدى. ساپالى ءبىلىمنىڭ ناتيجەسىندە ەرەكشە بالاسى بار ايەل-انالاردىڭ كوبى بۇگىندە جەكە كاسىپكە بەت بۇرىپ، ءوز ءىسىن اشا باستادى.
– ءقازىر ءبىز كاسىپكەرلىك نەگىزدەرى كۋرسىنىڭ ءتورتىنشى كۋرسىن اياقتادىق، بۇگىندە تۇلەكتەرىمىز ءوز بيزنەس-يدەيالارىن ۇسىنىپ جاتىر. بۇل – الەۋمەتتىك كاسىپكەرلىك سالاسىنداعى جوبالار، سەرەبرالدى سال اۋرۋىنا شالدىققان بالالارعا ارنالعان وڭالتۋ ورتالىعى، ساۋموتەراپيا، كەڭسە تەحنيكاسىن ەنگىزۋ، ۇيدەن پىسىرىلگەن تورتتار، تىگىنشىلىك، قازاق تىلىندە شەشەندىك ونەر كۋرستارى. قوردىڭ الماتى فيليالى 2019 جىلى اشىلدى. وسى ۋاقىت ارالىعىندا تالاي وتباسىنا قۋانىش سىيلادىق دەسەك قاتەلەسپەيمىز، – دەيدى «Mama Pro Almaty» قق فيليالىنىڭ جەتەكشىسى ەلەنا كيم.
ءيا، كۋرس تۇلەكتەرىنىڭ 99%-ى وتباسىنداعى ەموسيونالدىق جاعدايدىڭ جوعارىلاعانىن ايتقان. 60%-ى ءوز جوبالارىن ىسكە اسىرا باستايتىنىن، ال 67%-ى جاڭا ماماندىقتار تاڭداپ، جاڭا كاسىپ يگەرۋگە تالپىنىپ، ءبىلىمىن ءارى قاراي جەتىلدىرۋ ءۇشىن وقۋعا قاتىساتىنىن جەتكىزگەن.
– «ماما pro» قورىمەن ىنتىماقتاستىق اياسىندا جۋىردا «Qoldaý» كاسىپكەرلىك ورتالىعىنىڭ قىزمەتكەرلەرى «Qoldaý Start» جۇيەسى بويىنشا كاسىپكەرلىك نەگىزدەرىنە وقىتۋ بويىنشا ماستەر-كلاستار سەرياسىن وتكىزدى. وندا انالارعا بيزنەس-جوسپارلار جازۋعا كومەكتەستى، تىڭداۋشىلاردىڭ بۋحگالتەرلىك ەسەپ جۇرگىزۋ، سالىق سالۋ، ماركەتينگ جانە بالامالى وتكىزۋ نارىقتارىن ىزدەۋ سالاسىنداعى وزەكتى سۇراقتارىنا جاۋاپ بەردى، – دەيدى «Qoldaý» كاسىپكەرلىك ورتالىعىنىڭ كورپوراتيۆتىك دامۋ جانە جاڭا جوبالار دەپارتامەنتىنىڭ ديرەكتورى اقبوتا رۇستەمبەكوۆا.
جاقىندا قوردىڭ الماتىداعى فيليالى ەرەكشە قاجەتتىلىكتەرى بار بالالاردىڭ ءجاسوسپىرىم اعا-اپكەلەرى ءۇشىن دە ارنايى كۋرس اشتى. سەبەبى، ولاردا كوپ جاعدايدا مۇگەدەكتىگى بار باۋىرى ءۇشىن وزگەلەر الدىندا ۇيالۋ، ءوزىن قولايسىز سەزىنۋ سەزىمى بايقالادى ەكەن. سوندىقتان مۇنداي بالالارعا دا پسيحولوگتاردىڭ كومەگى قاجەت كورىنەدى. ءارى ولار كوبىنە اتا-اناسىنىڭ نازارىنا تىس قالىپ جاتادى. ويتكەنى اكە-شەشەنىڭ بار كوڭىلى كوبىنە اۋرۋ بالادا بولادى. مىنە، وسى ورايدا ەرەكشە بالالارىن باعىپ-قاعىپ وتىرعان ءۇش انا بالانى وڭالتۋ الدىمەن انانىڭ ءوزىن ساۋىقتىرۋدان باستالاتىنىن ءتۇسىنىپ، ورتالىق اشتى. بۇگىندە بالانىڭ دياگنوستيكاسىنا باعىتتالعان ورتالىق كوپ، ال انالارعا ەشتەڭە جوق. مۇنداي ماسەلەگە تاپ بولعان ايەل كۇيزەلىسكە تۇسەدى، سوسىن ءوزىن جالعىز سەزىنەدى. مىنە، ولاردىڭ جانىنان وسى كەزدە «ماما Pro» تابىلىپ ءجۇر.
تاياۋدا اتالمىش قور مەملەكەتتىك تىلدە كۋرستار اشۋدى جوسپارلاپ وتىر. مامانداردىڭ مالىمەتىنشە، بۇگىندە قازاقستاندا ەرەكشە ءبىلىم بەرۋ قاجەتتىلىگى بار 100 مىڭنان استام بالا تۇرادى.