ەۋرووداق پەن قازاقستان – جاقسى سەرىكتەستەر.
مەملەكەت باسشىسى ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى – ەۋروپالىق كوميسسيانىڭ ۆيسە-پرەزيدەنتى جوزەپ بوررەلمەن كەزدەستى، دەپ حابارلايدى Almaty-akshamy.kz اقورداعا سىلتەمە جاساپ.
قاسىم-جومارت توقايەۆ جوزەپ بوررەلگە ءىلتيپات بىلدىرە وتىرىپ، ونىڭ استاناعا ساپارى قازاقستان مەن ەۋرووداق اراسىنداعى قارىم-قاتىناستاردى نىعايتۋ تۇرعىسىنان وتە ماڭىزدى ەكەنىن اتاپ ءوتتى. پرەزيدەنت قازاقستان مەن ەۋروپالىق وداق اراسىنداعى كەڭەيتىلگەن سەرىكتەستىك پەن ىنتىماقتاستىق تۋرالى كەلىسىم بارلىق سالاداعى ىنتىماقتاستىقتى تەرەڭدەتۋدىڭ جاڭا كەزەڭىنە جول اشقانىن ايتتى.
«ءبىز قازاقستان مەن ەۋرووداق اراسىنداعى جوعارى دەڭگەيدەگى بايلانىستاردى قولدايمىز. وسىعان بايلانىستى ەۋروپالىق كەڭەستىڭ پرەزيدەنتى شارل ميشەلدىڭ وتە تابىستى بولعان ساپارىن جانە ەۋروپالىق كوميسسيانىڭ پرەزيدەنتى ۋرسۋلا فون دەر ليايەنمەن جۇرگىزگەن كەلىسسوزىمدى اتاپ وتكىم كەلەدى. ءبىز ىنتىماقتاستىعىمىزدىڭ كوپتەگەن ماسەلەسى بويىنشا ءوزارا تۇسىنىستىككە قول جەتكىزدىك دەپ ويلايمىن. سونداي-اق ەگيپەتتە قازاقستان پرەمەر-مينيسترى مەن ۋرسۋلا فون دەر ليايەن قول قويعان مەموراندۋمدى قۇپتايمىن. بۇل – ءوزارا ىنتىماقتاستىق تۇرعىسىنان وتە ناقتى قادام»، – دەدى مەملەكەت باسشىسى.
ءوز كەزەگىندە جوزەپ بوررەل قاسىم-جومارت توقايەۆقا قۇرمەت كورسەتە وتىرىپ قابىلداعانى ءۇشىن العىس ايتىپ، استانا مەن بريۋسسەل اراسىنداعى ءوزارا قارىم-قاتىناستاردىڭ قارقىندى دامىپ كەلە جاتقانىن اتاپ ءوتتى.
«ەۋرووداق پەن قازاقستان – جاقسى سەرىكتەستەر. ءبىز ءوزارا سەنىم مەن قۇرمەت كورسەتە وتىرىپ، ورتاق سىن-قاتەرلەر تۋرالى ايتامىز. سىزدەر قازاقستاندى اشىق، ينكليۋزيۆتى جانە دەموكراتيالىق ەل ەتۋ ءۇشىن وزگەرىستەر جاساۋعا باعىتتالعان رەفورمالار ۇدەرىسىن باستادىڭىزدار. مەنىڭ ساپارىم وسى وتە ماڭىزدى كەزەڭمەن تۇسپا-تۇس كەلىپ وتىر»، – دەدى ەۋروپالىق وداقتىڭ جوعارعى وكىلى.
كەزدەسۋ بارىسىندا قازاقستان مەن ەۋروپالىق وداق اراسىنداعى ەكونوميكالىق جانە ينۆەستيسيالىق بايلانىستاردى ودان ءارى نىعايتۋ پەرسپەكتيۆالارى تالقىلاندى.
ەسكە سالساق، ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەل قازاقستانعا ساپارى قارساڭىندا قازاقپاراتتىڭ مەنشىكتى تىلشىسىنە ەكسكليۋزيۆ سۇحبات بەردى.