امەريكالىق بلوگەر ءارى كونسەرۆاتيۆ بەلسەندى چارلي كيرككە يۋتا القابى ۋنيۆەرسيتەتىندە ءسوز سويلەپ تۇرعان ساتىندە وق اتىلدى، - دەپ حابارلايدى اqshamnews.kz DW-گە سىلتەمە جاساپ.
وقيعا 10 قىركۇيەك، سارسەنبى كۇنى بولعان.
كيرك موينىنان جاراقات الىپ، اۋرۋحاناعا جەتكىزىلدى.
"ءبارىمىز چارلي كيرك ءۇشىن دۇعا ەتۋىمىز كەرەك. ول كەرەمەت جان ەدى. قۇداي جار بولسىن!" – دەپ وقيعاعا اقش پرەزيدەنتى دونالد ترامپ Truth Social جەلىسىندە پىكىر ءبىلدىردى.
ءبىراق بىرنەشە ساعاتتان كەيىن ترامپ كيركتىڭ قازا تاپقانىن حابارلادى.
"ەشكىم اقش جاستارىن چارليدەي ءتۇسىنىپ، سەزىنە المادى. ونى ءبارىمىز، اسىرەسە مەن، جاقسى كورىپ، قۇرمەتتەيتىنبىز. ەندى ول جوق. مەلانيا ەكەۋمىز ونىڭ جارى ەريكاعا جانە بۇكىل وتباسىنا قايعىرىپ كوڭىل ايتامىز"، – دەدى اقش پرەزيدەنتى.
بەلسەندىنىڭ قازاسىنان كەيىن اق ءۇي باسشىسى ەل اۋماعىنداعى بارلىق جەردە تۋدى 14 قىركۇيەك، جەكسەنبى كەشىنە دەيىن ءتۇسىرۋدى تاپسىردى.
باستاپقىدا پوليسيا كۇدىكتىنى قولعا تۇسىرگەنىمەن، كەيىن ونىڭ اتىس جاساعان ادام ەمەسىن انىقتادى. كەيىنىرەك FBI باسشىسى كەش پاتەل كيركتى ءولتىرۋ ىسىنە بايلانىستى كۇدىكتى ۇستالعانىن مالىمدەدى، ءبىراق ونىڭ ءاتى-جونى جاريالانعان جوق.
چارلي كيرك تۋرالى نە بەلگىلى؟
چارلي كيرك – دونالد ترامپتىڭ جاقتاسى، مەديادا ءجيى كورىنىپ، ءتۇرلى وقۋ ورىندارىندا دارىستەر مەن پىكىرتالاستار وتكىزەتىن ەدى.
ايتا كەتەيىك، 2024 جىلعى 14 شىلدەدە دونالد ترامپقا دا قاستاندىق جاسالعان ەدى. بەيمالىم بىرەۋ پەنسيلۆانيا شتاتىندا ونىڭ ميتينگىسى كەزىندە وق اتقان. ترامپ قۇلاعىنان جاراقات الىپ، ءبىر قاتىسۋشى مەن اتىس باستاعان ادام قازا تاپقان. سونداي-اق سول جىلدىڭ 12 قىركۇيەگىندە فلوريداداعى گولف كلۋبىنان شىققان ساتىندە ترامپقا تاعى وق اتىلعان. كەيىن پوليسيا كلۋب ماڭىندا شاتىر تىگىپ، ونى اڭدىپ جۇرگەن كۇدىكتىنى ۇستاعان.