ەلەكتر ستانسيالارى مەن قازاندىقتاردا وتىن قورىنىڭ جەتكىلىكسىزدىگىنەن توتەنشە جاعداي تۋىنداسا نەمەسە ىستەن شىعۋ بولسا، مەكەمە باسشىلىعىنا 345 مىڭنان 6،9 ملن تەڭگەگە دەيىن ايىپپۇل سالىنادى.
بۇل تۋرالى ءماجىلىستىڭ قاراۋىنا بەرىلگەن «ق ر اكىمشىلىك قۇقىقبۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا جازىلعان، دەپ حابارلايدى قازاقپارات ءتىلشىسى.
دەپۋتاتتاردىڭ تالقىلاۋىنا ۇسىنىلعان قۇجاتتا اكىمشىلىك كودەكسكە «كۇزگى-قىسقى جاعدايلاردا جىلۋ ەلەكتر ستانسيالارى مەن قازاندىقتاردىڭ وتىن قورىنىڭ بەكىتىلگەن نورماتيۆتەرىن ساقتاماۋى» تۋرالى 300-2 بابى ەنگىزىلەتىنى كورسەتىلگەن. وعان سايكەس،
«ەلەكتر ستانسياسى مەن قازاندىقتىڭ تومەندەتىلگەن پارامەترلەردەگى جۇمىسى سالدارىنان اۆاريالارعا نەمەسە وزگە دە توتەنشە جاعدايلارعا اكەپ سوققان جىلۋ ەلەكتر ستانسيالارى مەن قازاندىقتاردىڭ وتىن قورىنىڭ بەكىتىلگەن نورماتيۆتەرىن ساقتاماۋى: شاعىن كاسىپكەرلىك سۋبەكتىلەرىنە – 100 (1 اەك – 3450 تەڭگە)، ورتا كاسىپكەرلىك سۋبەكتىلەرىنە – 500، ءىرى كاسىپكەرلىك سۋبەكتىلەرىنە – 1000 اەك مولشەرىندە ايىپپۇل سالۋعا اكەپ سوعادى.
ەلەكتر ستانسياسى مەن قازاندىقتىڭ نەگىزگى جابدىقتارىنىڭ توقتاۋىنا اكەپ سوققان جىلۋ ەلەكتر ستانسيالارى مەن قازاندىقتاردىڭ وتىن قورىنىڭ بەكىتىلگەن نورماتيۆتەرىن ساقتاماۋى: شاعىن كاسىپكەرلىك سۋبەكتىلەرىنە – 200، ورتا كاسىپكەرلىك سۋبەكتىلەرىنە – 1 000، ءىرى كاسىپكەرلىك سۋبەكتىلەرىنە – 2 000 اەك كورسەتكىش مولشەرىندە ايىپپۇل سالۋعا اكەپ سوعادى»، - دەلىنگەن جاڭا باپتا.
قۇجاتتىڭ تۇسىندىرمەسىندە كورسەتىلگەندەي، ق ر اكىمشىلىك قۇقىق بۇزۋشىلىق تۋرالى كودەكسىنە مۇنداي وزگەرىس وتىن تاپشىلىعىنان تۋىنداعان توتەنشە جاعدايلاردىڭ الدىن الۋ ماقساتىندا ەنگىزىلىپ وتىر.
«بۇل – ەنەرگيا ءوندىرۋشى ۇيىمداردا ەلەكتر ستانسيالارىنىڭ توقتاپ قالۋىنا نەمەسە تومەندەتىلگەن پارامەترلەردە جۇمىس ىستەۋىنە اكەپ سوقتىراتىن وتىن تاپشىلىعىنان تۋىنداعان توتەنشە جاعدايلاردىڭ الدىن الۋ ماقساتىندا ۇسىنىلادى»، - دەپ تۇسىندىرمە بەرىلگەن ەنگىزىلگەلى وتىرعان باپقا.
ايتا كەتەيىك، قولدانىستاعى زاڭنامادا مۇنداي باعىتتاعى قۇقىقبۇزۋشىلىق ارەكەتتەرىنە جول بەرگەن بيزنەس سۋبەكتىلەرىن جاۋاپكەرشىلىككە تارتاتىن نورما جوق.