قازاقستاننىڭ 19 ميلليونىنشى تۇرعىنى جانيا ازامات قىزى جەتىسۋ جەرىندە دۇنيەگە كەلدى.
الماتى وبلىسىنىڭ اكىمى اماندىق باتالوۆ قازاقستاننىڭ 19 ميلليونىنشى تۇرعىنى جانيا ازامات قىزىنىڭ اتا-اناسىنا قۇتتىقتاۋ حاتىن جولدادى، دەپ حابارلايدى Almaty-akshamy.kz.
وبلىس اكىمىنىڭ باسپا ءسوز قىزمەتىنىڭ مالىمەتى بويىنشا، جانيا ازامات قىزى ىلە اۋدانىنىڭ تۇرعىندارى نۇرعالييەۆتار وتباسىندا دۇنيەگە كەلگەن.
«قازاقستاننىڭ 19 ميلليونىنشى تۇرعىنى جانيا ازامات قىزىنىڭ جەتىسۋ جەرىندە، سىزدەردىڭ وتباسىلارىڭىزدا ومىرگە كەلۋىمەن شىن جۇرەكتەن قۇتتىقتايمىن!
بۇل – ەل تاۋەلسىزدىگىنىڭ 30 جىلدىعىنداعى ايتۋلى وقيعا، ءبىر وتباسىنىڭ عانا ەمەس، بارشا جۇرتشىلىقتىڭ قۋانىشى. وسى اقجولتاي ءسۇيىنشى حاباردى پرەزيدەنتىمىز قاسىم-جومارت كەمەل ۇلى توقايەۆ جاريالاعان ساتتە ونى، اسىرەسە، جەتىسۋلىقتار زور ريزاشىلىقپەن قابىلدادى.
وسىدان نەبارى ءتورت جىل بۇرىن ءبىزدىڭ الماتى وبلىسىندا مەملەكەتىمىزدىڭ 18 ميلليونىنشى تۇرعىنى ءمۇسليما سامات قىزى دۇنيە ەسىگىن اشقان ەدى. مىنە، از عانا ۋاقىتتا ەلىمىزدەگى دەموگرافيالىق ءوسىمنىڭ ناتيجەسىندە 19 ميلليونىنشى مەجەگە جەتىپ وتىر. بۇل - قازاقستاننىڭ تۇراقتىلىعى مەن وركەندەۋىنىڭ، حالىقتىڭ بولاشاققا دەگەن زور سەنىمىنىڭ ايقىن كورىنىسى.
بارشا جەتىسۋلىقتاردىڭ اتىنان كىشكەنتاي ءسابيدىڭ امان-ساۋ ەر جەتىپ، ەلدىڭ ابىرويلى ازاماتى بولىپ وسۋىنە تىلەكتەستىك بىلدىرەمىن! وتباسىلارىڭىزعا باق-داۋلەت، ۇرپاقتارىڭىزعا جارقىن ءومىر تىلەيمىن. ەل ءىشىنىڭ تىنىشتىعى مەن بەرەكەسى نىعايىپ، حالقىمىزدىڭ ىرىسى ارتا بەرسىن!» - دەلىنگەن قۇتتىقتاۋ حاتتا.
جالپى 1 ماۋسىمداعى مالىمەت بويىنشا، الماتى وبلىسىنداعى تۇرعىندار سانى 2 088 822 ادامعا جەتتى.