AMANAT دەپۋتاتتارى جابىق ەسىك جاعدايىندا ۋاقىت بەلدەۋى ماسەلەسىن تالقىلاپ، ۇكىمەتكە تالاپ قويدى. AMANAT پارتياسىنىڭ ماجىلىستەگى فراكسيا جەتەكشىسى ەلنۇر بەيسەنبايەۆ ۋاقىت بەلدەۋىنە قاتىستى جابىق فورماتتا وتكەن جيىننىڭ سەبەبىن ءتۇسىندىردى، دەپ حابارلايدى aqshamnews.kz
دەپۋتاتتار جيىنى تۋرالى اقپارات پارتيانىڭ Telegram-ارناسىندا تەك كەشكى ساعات 22:00-دە پايدا بولدى. مالىمدەمەدە ۇكىمەتكە 2025 جىلدىڭ ناۋرىزىنا دەيىن ۋاقىت بەلدەۋىن زەرتتەۋدى اياقتاۋ مىندەتتەلگەنى ايتىلدى. جيىندا ساۋدا جانە ينتەگراسيا ءمينيسترى ارمان شاققالييەۆ، دەنساۋلىق ساقتاۋ ءمينيسترى اقمارال ءالنازاروۆا جانە عىلىم جانە جوعارى ءبىلىم ءمينيسترى ساياسات نۇربەك تە بولدى.
AMANAT ءتوراعاسى ەرلان قوشانوۆ زەرتتەۋدىڭ ءۇش اي ىشىندە اياقتالۋى ءتيىس ەكەنىن كەسىپ ايتتى:
"ءبىز ۇكىمەتتەن ازاماتتاردىڭ دەنساۋلىعىنا، جايلى ومىرىنە اسەر ەتەتىن ناقتى جاۋاپ كۇتەمىز. ءۇش جىل — تىم ۇزاق. ناۋرىزدا زەرتتەۋ ناتيجەلەرى مەن ناقتى ۇسىنىستار كۇتەمىز،" — دەدى ول.
ەلنۇر بەيسەنبايەۆ زەرتتەۋدىڭ قانشا قاراجاتتى قاجەت ەتەتىنى تۋرالى ناقتى جاۋاپ بەرە المادى:
"ءبىز شىعىن مولشەرىن بىلمەيمىز. ءبىراق بۇل اقشا بۇرىننان بولىنگەن. ءار تەڭگەگە ەسەپ بەرىلەدى دەپ سەنەمىن،" — دەدى ول.
كوپشىلىك نازارىن اۋدارتقان ماسەلەنىڭ جابىق تالقىلانۋى دا سۇراق تۋدىردى. بۇل سۇراققا بەيسەنبايەۆ بىلاي جاۋاپ بەردى:
"بۇل فراكسيانىڭ جۇمىس وتىرىسى. كەيدە جۋرناليستەردى شاقىرامىز، كەيدە شاقىرمايمىز."
بەيسەنبايەۆ پارتيانىڭ ۋاقىت بەلدەۋىن وزگەرتۋدى قولدامايتىنىن ناقتىلادى:
"ءبىز قىركۇيەكتە ۇكىمەتكە ءوز ۇستانىمىمىزدى ايتتىق. بۇل شەشىم جەتكىلىكتى سارالانباعان. 10 ميلليوننان استام قازاقستاندىق قارسى ەكەنىن ءبىلدىردى. ءبىز حالىقتىڭ پىكىرىن قۇرمەتتەيمىز."
جۋرناليستەر "حالىقتىڭ پىكىرىن ۇكىمەتكە قاراعاندا جوعارى قويۋ كەرەك" دەگەندە، بەيسەنبايەۆ حالىقتىڭ مۇددەسىن قورعايتىنىن جەتكىزدى:
"AMANAT حالىقتىڭ ۋاقىتتى كەرى قايتارۋ تالابىن قولدايدى. بىزگە مىڭداعان حات كەلىپ جاتىر. حالىقتىڭ قالاۋىن فراكسيا وتىرىسىندا تولىق جەتكىزدىك،" — دەپ قورىتىندىلادى ول.
حالىقتىڭ پىكىرى مەن ۇكىمەتتىڭ شەشىمى اراسىندا قالىپتاسقان تەكەتىرەس شيەلەنىسىپ تۇر. ۋاقىت ماسەلەسى بويىنشا تۇپكىلىكتى شەشىم الداعى ناۋرىزدا بەلگىلى بولماق.