الماتى تاۋلارىندا العاش رەت بۇلاقتاردى اباتتاندىرۋ جۇمىستارى اياقتالدى
الماتى قالاسىنىڭ تۋريزم باسقارماسى قالاداعى تانىمال تاۋلى ايماقتاردا ءۇش بۇلاقتى اباتتاندىرۋ جۇمىستارىن اياقتادى، دەپ حابارلايدى aqshamnews.kz
· «اق-بۇلاق» بۇلاعى (پروسۆەششەنەس) تەڭىز دەڭگەيىنەن 1 610 مەتر بيىكتىكتە ورنالاسقان؛
· «بۋتاكوۆكا-1» بۇلاعى تەڭىز دەڭگەيىنەن 1 850 مەتر بيىكتىكتە ورنالاسقان؛
· «بۋتاكوۆكا-2» بۇلاعى تەڭىز دەڭگەيىنەن 2 150 مەتر بيىكتىكتە ورنالاسقان.
بۇل الماتىداعى مۇنداي باعىتتاعى العاشقى جوبالار جانە ولار حالىقارالىق تاجىريبەگە سۇيەنە جۇزەگە اسىرىلدى. بۇلاقتاردى اباتتاندىرۋ ءۇشىن زاماناۋي ماتەريالدار - جوعارى ساپالى بولات، اعاش جانە تاس قولدانىلدى، بۇل نىسانداردى قورشاعان تابيعي ورتاعا بارىنشا بەيىمدەۋگە جانە كەيىنگى كۇتىم قاجەتتىلىگىن ازايتۋعا مۇمكىندىك بەردى.
بۇلاقتاعى الاڭدار 5 مم قالىڭدىقتاعى تورلى مەتالدان جاسالعان، بۇل ولاردىڭ بەرىكتىگى مەن كەز كەلگەن ۋاقىتتا جىل بويى قولجەتىمدىلىگىن قامتاماسىز ەتەدى. بۇلاقتارعا اپاراتىن ىڭعايلى جولدار، دەمالۋ ءۇشىن ورىندىقتار ورناتىلعان. اقپاراتتىق تاقتالار بۇلاقتاردىڭ ءمانى مەن تابيعي قۇندىلىعى تۋرالى اقپارات بەرەدى.
بۇلاقتار تەك تاۋلى مارشرۋتتاردى ادەمى ەتپەيدى، سونىمەن بىرگە ەكولوگيالىق جانە بەلسەندى ءتۋريزمدى دامىتۋعا ىقپال ەتەدى. الماتى قالاسىنىڭ تۋريزم باسقارماسى ايماقتىڭ بىرەگەي تابيعي رەسۋرستارىن ساقتاۋ ءۇشىن كەلۋشىلەردى بۇلاقتاردى تازا ۇستاۋعا جانە ولارعا مۇقيات قاراۋعا شاقىرادى.