جىلدىڭ باستاۋى بولعان 13 ناۋرىزدى ماڭعىستاۋلىقتار بيىل دا ادەتتەن تانباي، «اداي اتا-وتپان تاۋ» تاريحي-مادەني كەشەنىندە قارسى الدى.
جىلداعى داستۇرمەن كوپشىلىك باتىس قاراتاۋدىڭ ەڭ بيىك نۇكتەسى وتپان تاۋدىڭ باسىنا جينالدى، دەپ حابارلايدى Almaty-akshamy.kz
تاۋدىڭ ەڭ بيىك نۇكتەسىندە «بىرلىك» وتىن جاعىپ، قازاق ەلىنە بەيبىت عۇمىر تىلەدى. بيىلعى شاراعا 10 مىڭعا جۋىق ادام جينالعان. ولاردىڭ قاتارىندا تۇركيا، وزبەك-قىرعىز ەلدەرى مەن ءازىربايجاننان كەلگەن دەلەگاتتار بار. كورىسۋ مەرەكەسىندە كۇن رايى دا قۋانتتى، اۋا تەمپەراتۋراسى +20 گرادۋسقا دەيىن كوتەرىلدى. تاۋ ەتەگىندەگى «قاراشاڭىراق» كەشەنى الدىنا 50-گە تارتا كيىز ءۇي تىگىلدى. تاڭسارىدەن جيىلعان كوپشىلىك بىر-بىرىمەن قۇشاق جايا كورىسىپ، قىستان امان-ەسەن شىعۋىمەن قۇتتىقتادى.
ءار شاڭىراق يەسى قازان تولتىرا اس سالىپ، تورگە وزعان ادامعا ۇلتتىق سۋسىن شۇبات-قىمىز بەن باۋىرساق ۇسىندى. بۇل كۇنى ماڭعىستاۋعا ەلىمىزدىڭ ءار وڭىرىنەن سىيلى قوناقتار كەلدى.
«ەندى باستالىپ جاتقان كەزىندە كەلىپ ەدىم. جالپى، ءومىردىڭ ءوزى سالىستىرۋمەن وتەتىن نارسە عوي، قاي كەزدە دە. ول كەزدە ۇيلەردىڭ دە جاعدايلارى ونشا بولماعان ەدى. ءقازىر ەلدىڭ ءال-اۋقاتى جاقسارعانىن كورسەتىپ تۇر. اۋماقتى شارا بولىپ جاتىر. سول اتا-بابانىڭ اتىن دارىستەپ، كەلەشەك ۇرپاققا ءبىر تالىم-تاربيە بولسىن دەگەن ماعىنا عوي»، - دەيدى شاراعا قاتىسۋشى شايقۇلا الدابەرگەن ۇلى.
كونسەرتتىك شارادان بولەك الاڭدا ۇلتتىق ويىندار وتكىزىلدى. ەر-ازاماتتار ارقان تارتۋدان سىنعا تۇسسە، بالالار اسىق اتۋدان مەرگەندىك تانىتتى. جەڭىمپازدارعا باعالى سىيلىقتار بەرىلدى. جاسى 95-كە كەلگەن قاريانىڭ اق باتاسىن بەرىپ، كوپشىلىك ءداستۇرلى شارانىڭ ەڭ ماڭىزدى ءبولىمى - «بىرلىك» وتىنىڭ جاعىلۋىن اسىعا كۇتتى. «بىرلىك» وتى تۇتانىپ، الاۋ وتپان تاۋدىڭ باسىنا جەتكىزىلىپ، قازاق مەملەكەكەتى الەمگە پاش ەتكەن بەيبىتشىلىك، بىرلىكتىڭ ايقىن كورىنىسى رەتىندە مازداپ تۇرادى.