ەلىمىزدە ساتىلعان 14 مىڭعا جۋىق التىن قۇيمانىڭ كوپ بولىگىن الماتىلىقتار العان.
2024 جىلدىڭ III توقسانىندا ەكىنشى دەڭگەيلى بانكتەر مەن بانكتىك ەمەس جەكەلەگەن ايىرباستاۋ پۋنكتەرىندە جالپى سالماعى 475،5 كەلى 13 940 التىن قۇيما ساتىلدى، دەپ حابارلايدى aqshamnews.kz
ۇلتتىق بانك 2017 جىلى حالىققا تازارتىلعان التىن قۇيمالاردى ساتۋ جانە ساتىپ الۋ باعدارلاماسىن ىسكە قوسقان بولاتىن. باعدارلاما باستالعالى جالپى سالماعى 7،4 توننا بولاتىن 199 235 التىن قۇيما ساتىلدى.
التىن قۇيمالار بەس ءتۇرلى سالماقتا ۇسىنىلادى: 5، 10، 20، 50 جانە 100 گرامم. ساتىپ الۋشىلار اراسىندا وتە جوعارى سۇرانىسقا يە ءتۇرى – 10 گرامدىق التىن قۇيما. جالپى ساتىلعان قۇيمالار اراسىندا ونىڭ ۇلەسى – 24% (48 629 دانا). ودان كەيىن 100 گرامدىق التىن قۇيمادان 47 227 دانا (24%)، 5 گرامدىق قۇيمادان 44 127 دانا (22%)، 20 گرامدىق قۇيمادان 31 612 دانا (16%) جانە 50 گرامدىق قۇيمادان 27 640 دانا (14%) ساتىلعان، – دەلىنگەن ۇب حابارلاماسىندا.
اقپاراتقا سايكەس، 2024 جىلعى III توقساندا التىن قۇيمالاردىڭ ەڭ كوپ بولىگى الماتىدا (8 101 دانا، 58%)، شىمكەنتتە (1 279 دانا، 9%) جانە استانادا (1 243 دانا، 9%) ساتىلدى.
باعدارلاما ىسكە اسقالى ەكىنشى دەڭگەيلى بانكتەر مەن بانكتىك ەمەس جەكەلەگەن پۋنكتەر جالپى سالماعى 1،1 توننا 41 058 التىن قۇيمانى كەرى ساتىپ العان. بۇل – جالپى ساتىلعان التىن قۇيمالاردىڭ 21%-ى. ولار كەرى ساتىپ الۋعا قابىلداعان ولشەمەلى قۇيمالاردىڭ بارلىعى حالىققا ۇلتتىق بانكتىڭ فيليالدارىنا كەرى تاپسىرۋسىز ساتىلادى.
ءاربىر قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى، ميكروتەكست جانە بەدەرلى جيەگى بار) جانە مەحانيكالىق زاقىمدانۋدان قورعايتىن ارنايى قوراپقا سالىنىپ شىعادى. سول ارقىلى قۇيمانىڭ اشىلعان-اشىلماعانىن وڭاي تەكسەرۋگە بولادى. قورعاپ تۇراتىن قوراپ سونداي-اق ساپا سەرتيفيكاتى بولىپ سانالادى. سوندىقتان، التىن قۇيمانى ۇقىپتى ساقتاپ، قورابىن بۇلدىرمەۋگە كەڭەس بەرەمىز، – دەلىنگەن اقپاراتتا.
ءقازىر التىن قۇيمالاردى ءبىرقاتار ەكىنشى دەڭگەيلى بانككە، سونداي-اق بانكتىك ەمەس جەكەلەگەن پۋنكتەردەن ساتىپ الىپ، كەرى ساتۋعا بولادى.