قازاقستاننىڭ حالىق ءارتىسى، قازاق كسر ەڭبەك سىڭىرگەن مادەنيەت قىزمەتكەرى، كومپوزيتور جانە ءانشى التىنبەك قورازبايەۆ قازاقستاندا اتوم ەلەكتر ستانسياسىن (اەس) سالۋ ماسەلەسى بويىنشا رەفەرەندۋمعا قاتىستى، دەپ حابارلايدى aqshamnews.kz.
ونەر مايتالمانى №202 مەكتەپ-گيمنازياسىندا ورنالاسقان № 211 ۋچاسكەسىنە كەلدى. التىنبەك قورازبايەۆ رەفەرەندۋمنىڭ ماڭىزدىلىعىنا ەرەكشە توقتالدى.
"بۇگىن ءاربىر داۋىس ماڭىزدى. ءبىز وسى رەفەرەندۋم ناتيجەسى ارقىلى حالىقتىڭ كوڭىل-كۇيىن، سەنىمىن، ءۇمىتىن، قوعامىمىزدىڭ دامۋ جولىنداعى كوزقاراسىن بىلە الامىز. سوندىقتان بارشاڭىزدى دۇرىس شەشىم قابىلداۋعا شاقىرامىن"، - دەدى التىنبەك قورازبايەۆ.
ەستەرىڭىزگە سالا كەتەيىك، بۇگىن رەسپۋبليكالىق رەفەرەندۋم وتۋدە. الماتى تۇرعىندارى تۇرعىلىقتى جەرى بويىنشا سايلاۋ ۋچاسكەلەرىنە بارىپ، ساعات 20.00-گە دەيىن ءوز داۋىستارىن بەرە الادى.