بايقاۋ جەڭىمپازدارى سالتاناتتى تۇردە ماراپاتتالدى
مەملەكەت باسشىسى «التىن ساپا» جانە «پارىز» سىيلىقتارىنىڭ يەگەرلەرىن ماراپاتتاۋ راسىمىنە قاتىستى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
جيىن سوڭىندا مەملەكەت باسشىسى «التىن ساپا» جانە «پارىز» بايقاۋلارىنىڭ جەڭىمپازدارىن سالتاناتتى تۇردە ماراپاتتادى.
«التىن ساپا» سىيلىعىنىڭ «ۇزدىك يندۋستريالىق جوبا» نوميناسياسى بويىنشا پاۆلودار وبلىسىنىڭ «پرومماشكومپلەكت» كاسىپورنى، «ۇزدىك يننوۆاسيالىق جوبا» نوميناسياسى بويىنشا الماتى وبلىسىنىڭ «انتيگەن» عىلىمي-وندىرىستىك كاسىپورنى جەڭىمپاز اتاندى.
«پارىز» سىيلىعىنىڭ شاعىن جانە ورتا بيزنەس يەلەرى اراسىنداعى گران-پري جۇلدەسى اقمولا وبلىسىنىڭ «شۋيسكوە-XXI» جاۋاپكەرشىلىگى شەكتەۋلى سەرىكتەستىگىنە، ال ءىرى بيزنەس يەلەرى اراسىنداعى گران-پري جۇلدەسى اتىراۋ وبلىسىنىڭ «نورت كاسپيان وپەرەيتينگ كومپاني ن.ۆ.» كاسىپورنىنا تابىستالدى.
سونىمەن قاتار بيزنەسكە قولايلى جاعداي جاسالعان «ۇزدىك ءوڭىر» ساناتى بويىنشا ارنايى سىيلىققا شىمكەنت قالاسىنىڭ اكىمدىگى، «ۇزدىك اۋدان» ساناتى بويىنشا ارنايى سىيلىققا ساتبايەۆ قالاسىنىڭ اكىمدىگى يە بولدى.