قىز بالا ۇيدەن شىعىپ كەتكەن، ءبىراق مەكتەپكە دەيىن جەتپەگەن
الماتىدا پاترۋلدىك پوليسيا قىزمەتكەرلەرى 9 جاسار ايشا تيمۋردى قالاي تاپقانىن ايتىپ بەردى، – دەپ حابارلايدى Almaty-akshamy.kz Polisia.kz-كە سىلتەمە جاساپ.
7 جەلتوقسان كۇنى كامەلەتكە تولماعان ايشا تيمۋردىڭ جوعالعانى تۋرالى حابار الماتىنى ءدۇر سىلكىندىردى.
تاڭەرتەڭگى ساعات 07:40-تا قىز بالا ۇيدەن شىعىپ كەتكەن، ءبىراق مەكتەپكە دەيىن جەتپەگەن.
– بىزگە ساعات 09:00 شاماسىندا 9 جاسار ايشانىڭ جوعالعانى تۋرالى حابار كەلىپ ءتۇستى. بەلگىلەرى: قىزعىلت كۇرتەشە، كوك قالپاق، قىزىل سومكە، قارا ەتىك. ءبىز مەكەنجاي بويىنشا باردىق. اقپارات راستالدى. بالانى ىزدەستىرۋ جۇمىستارىنا تۇكسىب اۋداندىق پب-نىڭ جەكە قۇرامى، الماتى گارنيزونى مەن ەرىكتىلەر جۇمىلدىرىلدى. ءبىزدىڭ اۋىسىم ساعات 16:00-دە اياقتالدى. ءبىراق كۇندىزگى ىزدەستىرۋ ناتيجە بەرمەگەندىكتەن، مەن جانە ارىپتەستەرىم قىزمەتتە قالىپ، بالانى ىزدەۋدى جالعاستىردىق. مەن – ءۇش بالانىڭ اكەسىمىن. قىزدارىمنىڭ ءبىرى – ايشامەن قۇرداس. مەنى ايشانىڭ تاعدىرى قاتتى الاڭداتتى. بۇكىل گارنيزون، الماتى قالاسىنىڭ بارلىق تۇرعىندارى قىز ءۇشىن الاڭدادى، – دەدى جەرگىلىكتى پوليسيا قىزمەتى باسقارماسى پاترۋلدىك پوليسيا پولكىنىڭ ينسپەكتورى الماس قۇراقبايەۆ.
ءتارتىپ ساقشىسىنىڭ ايتۋىنشا، بەينەباقىلاۋ جۇيەلەرىنىڭ ارقاسىندا قىزدىڭ تروللەيبۋسقا مىنگەنىن انىقتاۋ مۇمكىن بولدى.
– جۇرگىزۋشىنىڭ ءنومىرىن تروللەيبۋس پاركىنىڭ ديسپەچەرىنەن سۇرادىق، وعان تەلەفون سوقتىق، ول ايشانىڭ تروللەيبۋستا ەكەندىگىن راستادى. بۇل تۋرالى دەرەۋ جبو-نىڭ كەزەكشىسىنە حابارلادىق. ەرىكتىلەرمەن بىرگە بايتۇرسىنوۆ پەن بۇقار جىراۋ كوشەلەرىنىڭ قيىلىسىندا تروللەيبۋستى قۋىپ جەتتىك. ايشا ىشىندە بولدى. مەن ونى كوتەرىپ، پاترۋلدىك كولىككە وتىرعىزىپ، پوليسيا باسقارماسىنا اپارىپ، اتا-اناسىنا تاپسىردىم. قۇدايعا شۇكىر، ول امان-ەسەن تابىلدى، – دەدى پوليسيا قىزمەتكەرى قۇراقبايەۆ.