اتىراۋ وبلىسىنىڭ ماحامبەت اۋدانىندا كونە قالاشىقتىڭ ورنى تابىلدى. عالىمدار ونى التىن وردا داۋىرىندەگى قالاشىق بولۋى مۇمكىن دەگەن بولجام جاساپ وتىر، دەپ حابارلايدى Almaty-akshamy.kz Inform.kz-كە سىلتەمە جاساپ.
كونە مەكەن سارايشىق قالاشىعىنان 25 شاقىرىم جەردە ورنالاسقان. اۋماعى – 100 گەكتار. قالاشىق ورنىندا «سارايشىق» مەملەكەتتىك مۋزەي-قورىعىنىڭ عالىمدارى ارحەولوگيالىق قازبا جۇمىستارىن جۇرگىزىپ جاتىر. وعان رەسەيدەن كەلگەن عالىمدار دا تارتىلعان.
ارحەولوگتەر كونە قالاشىقتى زەرتتەۋ ماقساتىنداعى قازبا جۇمىسى كەزىندە مازارعا ۇقساس نىساندى تاپقان. ونىڭ ىرگەتاسى، تومەنگى قاباتى سول كۇيىندە ساقتالعان.
«بۇل مەكەننەن قىش قۇمىرالار، تيىندار، ورتا عاسىرداعى جادىگەرلەر، ءحىV عاسىردىڭ تيىندارى تابىلىپ وتىر. بۇل – قازاقستان تاريحىنا قوسىلعان زور ۇلەس»، - دەيدى «سارايشىق» مەملەكەتتىك مۋزەي-قورىعىنىڭ ديرەكتورى ابىلسەيىت مۇحتار.
تاريح عىلىمدارىنىڭ دوكتورى، پروفەسسور ماديار ەلەۋوۆتىڭ ايتۋىنا قاراعاندا، كەيىنگى ەكى جىلدا 10 شاقتى قالاشىق پەن ەلدى مەكەننىڭ ورنى اشىلعان. سول قالاشىقتار ارقىلى ۇلى جىبەك جولى بويىنداعى سارايشىق قالاشىعىنان ءۇش باعىتقا شىعاتىن كەرۋەن باعىتى انىقتالىپ وتىر.
«ءقازىر قاراعايلى دەگەن جەردەن شاعىن كونە قالاشىقتىڭ ورنى تابىلدى. جەردىڭ بەتىندە جاتقان كونە زاتتاردىڭ سىنىقتارىنا قاراعاندا، بۇل مەكەندى التىن داۋىرىندەگى قازاق حاندىعىنىڭ قالاشىعى دەپ توپشىلاۋعا بولادى»، -دەيدى ماديار ەلەۋوۆ.