بيىل تۇڭعىش رەت «الماتىداعى التىن كۇز «قازاقكونسەرتپەن» بىرگە» ونەر فەستيۆالى وتەدى. اتالمىش جوبا كسرو مەن قازاقستاننىڭ حالىق ءارتىسى، «حالىق قاھارمانى» روزا ءتاجىباي قىزى باعلانوۆانىڭ 100 جىلدىعى اياسىندا جوسپارلانىپ وتىر، دەپ حابارلايدى Almaty-akshamy.kz Almaty.tv-گە سىلتەمە جاساپ.
روزا باعلانوۆا ۇزاق جىلدار بويى الماتىدا ەڭبەك ەتكەن. «قازاقتىڭ بۇلبۇلىنا» قانات ءبىتىرىپ، مۋزىكا ونەرىنىڭ بيىگىنە شارىقتاۋىنا شابىت بەرگەن الماتى قالاسى دەسەك، ارتىق بولماس. سوندىقتان «قازاقكونسەرتتىڭ» شىعارماشىلىق ۇجىمى روزا ءتاجىباي قىزى ەرەكشە جاقسى كورگەن الماتى قالاسىنداعى ءبىرقاتار مادەنيەت ۇيىمدارىندا اۋقىمدى مەرەكەلىك شارالار وتكىزۋدى جوسپارلاپ وتىر.
فەستيۆال شىمىلدىعى 25 قىركۇيەك كۇنى قۇرمانعازى اتىنداعى قازاق ۇلتتىق كونسەرۆاتورياسىنىڭ ەركەعالي راحمادييەۆ اتىنداعى ۇلكەن كونسەرت زالىندا «ءبىزدىڭ جارمەڭكە» اتتى ءداستۇرلى مۋزىكا كونسەرتىمەن اشىلادى. كونسەرتكە ۇلتتىق ونەر ورتالىعى مەن قۇرمانعازى اتىنداعى قازاق ۇلتتىق كونسەرۆاتورياسىنىڭ سوليستەرى مەن ۇجىمدارى، «استانا سازى» فولكلورلىق ءانسامبلى مەن «گۇلدەر» ءانسامبلىنىڭ جاڭا قۇرامى قاتىسادى.
27 قىركۇيەكتە اباي اتىنداعى قازاق ۇلتتىق وپەرا جانە بالەت تەاترىندا «كلاسسيكالىق مۋزىكا جاۋھارلارى» اتتى كلاسسيكالىق مۋزىكا كونسەرتى وتەدى. كونسەرتتە ەڭ تانىمال كامەرالىق-اسپاپتىق انسامبلدەردىڭ ءبىرى «Forte Trio»، قازاقستاننىڭ ەڭبەك سىڭىرگەن قايراتكەرلەرى ازامات جەلتىرگۋزوۆ، بيبىگۇل جانۇزاق، مەدەت چوتابايەۆ، سالتانات احمەتوۆا، «دارىن» مەملەكەتتىك جاستار سىيلىعىنىڭ لاۋرەاتى ازات مالىك جانە حالىقارالىق جانە رەسپۋبليكالىق بايقاۋلاردىڭ لاۋرەاتى ايگەرىم التىنبەك ونەر كورسەتەدى.
ونەر فەستيۆالى 6 قازاندا ءالىم بەيسەمبايەۆتىڭ جامبىل اتىنداعى قازاق مەملەكەتتىك فيلارمونياسىنىڭ مەملەكەتتىك اكادەميالىق سيمفونيالىق وركەسترىمەن بىرلەسكەن كونسەرتىمەن جالعاسادى. وركەسترگە قانات وماروۆ ديريجەرلىك ەتەدى. ءالىم بەيسەمبايەۆ - انگليانىڭ ليدس قالاسىندا وتكەن حح فورتەپيانوشىلار بايقاۋىنىڭ جەڭىمپازى، «ۋوتەرمان» التىن مەدالىنىڭ يەگەرى.
20 قازاندا Almaty Theatre-دا بەلگىلى ەسترادا ارتىستەرىنىڭ قاتىسۋىمەن «الماتىم جۇرەگىمدە» گالا-كونسەرتى وتەدى. شارادا الماتىلىقتار ءۇشىن حالىقتىڭ سۇيىكتىلەرىنە اينالعان «قازاقكونسەرتتىڭ» سوليستەرى قازاقستاننىڭ حالىق ءارتىسى، قازاقستاننىڭ ەڭبەك ەرى روزا رىمبايەۆا، قازاقستاننىڭ حالىق ارتىستەرى التىنبەك قورازبايەۆ، ماقپال ءجۇنىسوۆا، قازاقستاننىڭ ەڭبەك سىڭىرگەن ارتىستەرى باعدات سامەدينوۆا، ايجان نۇرماعامبەتوۆا، قازاقستاننىڭ ەڭبەك سىڭىرگەن قايراتكەرلەرى جاننا ورىنباساروۆا، قۇرماش ماحان، حالىقارالىق جانە رەسپۋبليكالىق بايقاۋلاردىڭ لاۋرەاتتارى رۋحيا بايدۇكەنوۆا، رايىم ۋايىس، اليبەك المادييەۆ، سالتانات مەڭدىعالييەۆا، ديدار ءابدۋحالىق، گۇلسىم مىرزابەكوۆا، ەربول ناريمان ۇلى، سونداي-اق «ازيا» جانە «مەلومەن» توپتارى ونەر كورسەتەدى.
فەستيۆال اياسىندا ەلىمىزدەگى جانە ورتالىق ازياداعى تۇڭعىش ءارى جالعىز مەملەكەتتىك ميۋزيكل تەاترى «Astana Musical» العاش رەت الماتىلىق كورەرمەندەرىنە بارلىق قويىلىمدارىن ساحنالاماق. 25 قازان كۇنى «نۇرسۇلتان نازاربايەۆ قورىنىڭ» كونسەرت زالىندا «سيقىرلى سازدى حور-كونسەرت» كونسەرت-سپەكتاكلى، 26 قازان كۇنى «№13» كومەدياسى قويىلادى.
27 قازاندا Almaty Theatre-دا الماتىلىق كورەرمەندەر «دوستار سەرتى» ميۋزيكلىن تاماشالاپ، 70-جىلدارداعى كونسەرۆاتوريانىڭ شىعارماشىلىق الەمىنە ساياحات جاسايدى. 28 قازاندا «نۇرسۇلتان نازاربايەۆ قورىنىڭ» كونسەرت زالىندا ۇرپاقتار اراسىنداعى قاراما-قايشىلىق، وسكەلەڭ ۇرپاقتىڭ ماسەلەلەرى، وقۋشىلاردىڭ قورشاعان ورتامەن قارىم-قاتىناسى سياقتى وزەكتى تاقىرىپتاردى قوزعايتىن «ەنت تاپسىرمايمىن» دراماسىن تاماشالاي الادى.
سونىمەن قاتار، كسرو مەن قازاقستاننىڭ حالىق ءارتىسى، «حالىق قاھارمانى» روزا ءتاجىباي قىزى باعلانوۆانىڭ 100 جىلدىعىنا وراي 29 قازان كۇنى Almaty Theatre-دا «Astana Musical» مەملەكەتتىك تەاترى وسى جىلدىڭ باستى پرەمەراسى - «روزا باعلانوۆا» ميۋزيكلىن ساحنالايتىن بولادى.