الماتى مارافونىنىڭ قاتىسۋشىسى، 47 جاستاعى رۇستەم سادىقوۆ مارە سىزىعىن كەسىپ وتكەننەن كەيىن قايتىس بولدى. بۇل تۋرالى مارافوندى ۇيىمداستىرۋ كوميتەتى ءمالىم ەتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
«وقىس جاعداي ساعات 09.35-تە ورىن الدى. رۇستەم 10 شاقىرىم قاشىقتىقتى جۇگىرىپ ءوتتى، تىركەلۋ كەزىندە وعان 8743 ءنومىرى بۇيىرعان» - دەدى «الماتى مارافونىنىڭ» ديرەكتورى سالتانات قازىبايەۆا.
جارىستىڭ باس دارىگەرى ورازبەك ساحوۆتىڭ ايتۋىنشا، مارقۇم رەسپۋبليكا الاڭىنداعى مارە سىزىعىن كەسىپ ءوتىپ، بىرنەشە مەتر قادام باسقاننان كەيىن بىردەن قۇلاپ تۇسكەن.
«ءبىز وعان بىردەن كومەك كورسەتە باستادىق. العاشقى كومەكتى «قازاقستاننىڭ قىزىل جارتى اي» ەرىكتىلەرى كورسەتتى، ارى قاراي جۇرەك-وكپە رەانيماسياسى (تىكەلەي ەمەس جۇرەك ماسساجى، اۋا وتكىزگىشتى پايدالانىپ امبۋ قاپشىعىمەن تىنىستاتۋ، بىرنەشە رەت دەفيبريللياسيا جاساۋ، ادرەنالين ينەكسيالارى) قالالىق جەدەل جاردەم ستانسياسىنىڭ قىزمەتكەرلەرىمەن بىرلەسىپ جۇرگىزىلدى. باستاپقىدا جۇرەك ىسكە قوسىلىپ، سينۋس ىرعاعى پايدا بولدى، ءبىراق 2 مينۋتتان كەيىن جۇرەك ۇستاماسى قايتا ۇستادى. رەانيماسيالىق شارالار 30 مينۋتقا سوزىلدى، ونىڭ سوڭعى 10 مينۋتى "جەدەل جاردەم" كولىگىندە جاسالدى. ساعات 10:15-تە كىسى ءولىمى تىركەلدى. رەسمي سەبەبىن سوت-مەديسينالىق ساراپتاما جۇرگىزىلگەننەن كەيىن عانا اتاۋعا بولادى» - ورازبەك ساحوۆ.
مارقۇمنىڭ جاقىندارىنىڭ ايتۋىنشا، ول جۇگىرۋ جارىسىنا ءبىرىنشى رەت قاتىسىپ وتىرعان جوق. ءساۋىر ايىندا الماتى جارتىلاي مارافونىنا، 2021 جىلعى الماتى مارافونىنا دا قاتىسىپ، 10 شاقىرىم قاشىقتىققا جۇگىرگەن.
جارىستى ۇيىمداستىرۋشىلار مارقۇمنىڭ تۋىستارى مەن جاقىندارىنا قايعىرىپ كوڭىل ايتادى. ولار مارقۇمنىڭ دەنەسىن استانا قالاسىنا تاسىمالداۋعا كومەكتەسەتىندەرىن جەتكىزدى.