«التىن ميكروفون» فەستيۆالى - تالانتتاردى شىڭداعان ونەر بايگەسى
بايقاۋدىڭ شەشۋشى كەزەڭىندە ەلىمىزدىڭ ءار وڭىرىنەن جانە الىس-جاقىن شەت ەلدەردەن كەلگەن جاس انشىلەر ونەر كورسەتتى، دەپ حابارلايدى Almaty-akshamy.kz
بەلگىلى ءانشى بەيبىت سەيدوللاۇلى ءتوراعالىق ەتكەن قازىلار القاسىنىڭ قۇرامىندا ارمەنيا، بولگاريا، قىرعىزستان، بەلورۋسسيا، ۋكراينا مەملەكەتتەرىنىڭ ءبىلىكتى ماماندارى بولدى. ولاردىڭ ءارقايسىسى وزدەرىمەن بىرگە ەندى قالىپتاسىپ كەلە جاتقان ەڭ دارىندى دەگەن تاڭداۋلى بىر-ەكى انشىدەن ەرتە كەلىپ، توبىل وڭىرىندەگى ونەر بايقاۋىنا قوستى. بيىلعى «التىن ميكروفوننىڭ» دەڭگەيى جوعارى بولدى.
كەزىندە «سلاۆيان بازارىندا» توپ جارعان ەرنار سادىربايەۆ وسى بايقاۋدان ءوسىپ شىققان. بۇگىنگى اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ بەلدى ءسوليسى بالۋان بەركەنوۆ تە - وسى «التىن ميكروفون» فەستيۆالىنەن ءوسىپ شىققان ءانشى.
بايقاۋدىڭ باستاپقى كەزەڭدەرى ونلاين تۇردە ءوتتى. فينالدىق باسەكەگە وسى ىرىكتەۋدەن ءوتىپ، جۇزدەن جۇيرىك شىققان 41 ونەرپاز قاتىستى. ولار جاس ەرەكشەلىكتەرىنە قاراي كىشى، ورتا، ەرەسەك جانە كاسىپقوي توپقا ءبولىنىپ، ءارقايسىسى ەكى-ەكى اننەن ورىنداپ شىقتى.
فەستيۆال جەڭىمپازدارى قازىلار القاسىنىڭ قالاۋى بويىنشا انىقتالدى. 7-10 جاس ارالىعىنداعى بالعىندار ىشىنەن السۋ ۇلتۋعانوۆا ءبىءرىنشى ورىندى جەڭىپ الدى. ال 11-13 جاس ارالىعىنداعى قاتىسۋشىلار اراسىنان قوستانايلىق ياسمينا ايۋپوۆا، 14-17 جاس ارالىعىنداعى ونەرپازداردىڭ ىشىنەن داريا ماتۆەيەۆا ۇزدىك شىقتى.
«كاسىپقويلار» توبى بويىنشا 1-ورىندى قوستانايلىق جاس ءانشى المات جاڭاباي جەڭىپ الدى. 2-ورىنعا تۇركيالىق ۆولكان تالشىك لايىق دەپ تانىلدى. ال گران-پري سىيلىعىن نۇر-سۇلتان قالاسىنان كەلگەن جاس دارىن اسلان امانگەلدييەۆ جەڭىپ الدى.
بيىل فەستيۆالدا قازاقستاننىڭ ەڭبەك سىڭىرگەن قايراتكەرى، كوپ جىلدار بويى وسى بايقاۋعا قازىلىق ەتىپ، تالاي تالانتتىڭ جولىن اشقان كومپوزيتور كەڭەس دۇيسەكەيەۆ اتىنداعى ارنايى سىيلىق تاعايىندالدى. تۇڭعىش ءجۇلدەنى قىزىلوردا وبلىسىنان كەلگەن تاعى ءبىر تالانتتى جاس ونەرپاز ەرالى ەسكەندىر يەلەندى.