الماتى گارنيزونىنىڭ ۇزدىك قىزمەتكەرلەرى مەن ءىىم ارداگەرلەرى ماراپاتتالدى

ءبىرقاتار قىزمەتكەرلەرگە ۇلگىلى قىزمەت اتقارعانى جانە قىزمەتتىك بورىشىن ءمىنسىز ورىنداعانى ءۇشىن ۆەدومستۆولىق ناگرادالار مەن مەرزىمىنەن بۇرىن اتاقتار بەرىلدى.

تاۋەلسىزدىك كۇنى قارساڭىندا ىشكى ىستەر ءمينيسترى الماتى گارنيزونىنىڭ قىزمەتكەرلەرى مەن اسكەري قىزمەتشىلەرىن – پوليسيا جانە قىلمىستىق-اتقارۋ جۇيەسى دەپارتامەنتتەرىنىڭ، قالالىق كۇزەت قىزمەتىنىڭ، ءىىم اكادەمياسى مەن كينولوگيالىق ورتالىعىنىڭ، ۇلتتىق ۇلان قىزمەتكەرلەرىن جانە ارداگەرلەردى ماراپاتتادى، دەپ حابارلايدى Almaty-akshamy.kz Polisia.kz سايتىنا سىلتەمە جاساپ.

ق ر پرەزيدەنتىنىڭ جارلىعىمەن «قازاقستان رەسپۋبليكاسىنىڭ تاۋەلسىزدىگىنە 30 جىل» مەدالىمەن الماتى گارنيزونىنىڭ 70-تەن استام ۇزدىك قىزمەتكەرى، سونداي-اق، ىشكى ىستەر ورگاندارى مەن ۇلتتىق ۇلاننىڭ ارداگەرلەرى ماراپاتتالدى.

«ەلىمىزدىڭ قالىپتاسۋى كەزەڭدەرىندە ىشكى ىستەر ورگاندارىنا ماڭىزدى ءرول بەرىلدى. ءبىزدىڭ ءارقايسىمىز ازاماتتاردى جانە ولاردىڭ تىنىشتىعىن قورعاۋ – ءبىزدىڭ كاسىبي پارىزىمىز ەكەنىن تۇسىنۋگە مىندەتتىمىز. ەلىمىزدىڭ ىشكى قاۋىپسىزدىگى ءبىزدىڭ جۇيەمىزدىڭ جانە ونىڭ ءاربىر قىزمەتكەرىنىڭ قىزمەت ناتيجەلەرىنە بايلانىستى»، – دەپ اتاپ ءوتتى ىشكى ىستەر ءمينيسترى.

ءىىم سالاسىنىڭ ارداگەرلەرىمەن كەزدەسۋدە ول مەملەكەتتىڭ تۇراقتىلىعىن، ازاماتتاردىڭ قاۋىپسىزدىگى مەن زاڭدى مۇددەلەرىن قامتاماسىز ەتۋدەگى پوليسيانىڭ ءرولىن اتاپ ءوتتى. ارداگەرلەرگە ىشكى ىستەر ورگاندارى جۇيەسىنىڭ قالىپتاسۋى مەن دامۋىنا قوسقان ۇلەسى، قىزمەتىنە ادالدىعى جانە جاس مامانداردى تاربيەلەگەنى ءۇشىن العىس ايتتى.