جامبىل وبلىسىندا سىنىپتاسىمەن جانجالداسىپ قالعان توعىزىنشى سىنىپ وقۋشىسى كوز جۇمدى، دەپ حابارلايدى اqshamnews.kz ءتىلشىسى. بۇل - وڭىردە ءبىر اپتا ىشىندە تىركەلگەن ەكىنشى وقۋشى ءولىمى.
وقيعا قالاي بولعان؟
الەۋمەتتىك جەلىلەردە تاراعان مالىمەتكە سۇيەنسەك، جانجال مەكتەپتىڭ اجەتحاناسىندا بولعان. ايتۋلارىنشا، وقۋشىنىڭ سىنىپتاسى ونى كەۋدە تۇسىنان ۇرىپ، سوققى اۋىر جاراقاتقا اكەلىپ سوققان.
پوليسيانىڭ رەسمي مالىمدەمەسى
جامبىل وبلىستىق پوليسيا دەپارتامەنتى بۇل اقپاراتتى راستادى. ءقازىر اتالعان دەرەك بويىنشا قىلمىستىق كودەكستىڭ 106-بابى 3-بولىگى ("باسقا ادامنىڭ دارمەنسىز كۇيىن بىلە تۇرا نەمەسە وعان ماتەريالدىق نە وزگە دە تاۋەلدىلىكتە بولعان كەزدە اۋىر زيان كەلتىرۋ") بويىنشا سوتقا دەيىنگى تەرگەۋ باستالدى.
"جەدەل-ىزدەستىرۋ شارالارى بارىسىندا كۇدىكتى ءجاسوسپىرىم انىقتالىپ، ۋاقىتشا ۇستاۋ يزولياتورىنا قامالدى. قازىرگى ۋاقىتتا ءىستى جان-جاقتى، تولىق جانە وبەكتيۆتى تەرگەۋگە باعىتتالعان بارلىق قاجەتتى تەرگەۋ امالدارى جۇرگىزىلىپ جاتىر"،-دەپ حابارلادى پوليسيا.
ءبىر اپتاداعى ەكىنشى ءولىم
ەسكە سالايىق، 12 قىركۇيەكتە جامبىل وبلىسى شۋ اۋدانىنا قاراستى كوكقاينار اۋىلىندا فۋتبول ماچى كەزىندە 10-سىنىپ پەن 11-سىنىپ وقۋشىلارى اراسىندا جانجال شىققان. جاسوسپىرىمدەر اراسىنداعى كيكىلجىڭ كەزىندە كىشى سىنىپتىڭ ءبىر وقۋشىسى اۋىر سوققى الىپ، وقيعا ورنىندا كوز جۇمدى.
وقيعا كۇنى پوليسيا 16 جانە 17 جاستاعى ەكى كۇدىكتىنى انىقتاپ، ۇستاعان بولاتىن.