بيىل مەكتەپ بىتىرۋشىلەر ەمتيحاندى ءوز مەكتەپتەرىندە تاپسىرادى.
مەكتەپتى ۇزدىك ءبىتىرىپ، «التىن بەلگى» توسبەلگىسىنە ۇمىتكەر تۇلەكتەرگە قويىلاتىن تالاپ كۇشەيتىلدى، دەپ حابارلايدى Almaty-akshamy.kz.
ق ر ءبىلىم جانە عىلىم ءمينيسترى اسحات ايماعامبەتوۆ وقۋ جەتىستىكتەرىن باعالاۋ ەرەجەلەرىنە وزگەرىستەر ەنگىزۋ تۋرالى قول قويدى. ەندى «التىن بەلگى» الۋ تالاپتارى ايتارلىقتاي كۇشەيتىلدى. بۇل تۋرالى بعم باسشىسى ءوزىنىڭ Telegram كانالىندا جازدى.
«كەلەسى جىلدان باستاپ 9-سىنىپتى اياقتاپ، ارنايى اتتەستات جانە 10-11 سىنىپتاردىڭ بارلىق وقۋ توقسانى بويىنشا «ۇزدىك» دەگەن باعا العان وقۋشىلار «التىن بەلگى» توسبەلگىسىنە ۇمىتكەر بولا الادى»، – دەپ حابارلادى ول.
سونداي-اق، تالاپكەرلەر نازاربايەۆ زياتكەرلىك مەكتەبى بازاسىندا ماتەماتيكا پانىنەن ەمتيحان تاپسىرۋى كەرەك. ءمينيستردىڭ سوزىنشە بۇل شارا اكادەميالىق ادالدىقتى قامتاماسىز ەتۋ ءۇشىن قابىلدانعان.
«بۇل رەتتە تاپسىرمالار نزم-گە ەمتيحان تاپسىراتىندارعا دا، جالپى ءبىلىم بەرەتىن مەكتەپ بازاسىندا تاپسىراتىندارعا دا تاپسىرمالار بىردەي بولادى» – دەپ اتاپ ءوتتى مينيستر.
ايماعامبەتوۆتىڭ ايتۋىنشا، بىلتىر «التىن بەلگى» العان تۇلەكتەر سانى رەكوردتىق دەڭگەيگە جەتكەن. الايدا ول تۇلەكتەردىڭ ءبىرشاما بولىگى ۇبت-دان تومەن بالل العان. وسىعان بايلانىستى ۇمىتكەرلەردى ۇزدىك بەلگىسىنە وبەكتيۆتى جانە اشىق باعالاۋ ءۇشىن ەمتيحانداردىڭ ءبىرى تاۋەلسىز ءبىلىم بەرۋ ۇيىمىندا وتەدى.
«بيىل مەكتەپ بىتىرۋشىلەر ەمتيحاندى ءوز مەكتەپتەرىندە تاپسىرادى. سونداي-اق بەلگىدەن باس تارتۋ تۋرالى وتىنىشتەر جارامسىز. تالاپتارعا ساي كەلەتىن ۇمىتكەرلەر بەلگىلەنگەن تارتىپتە قورىتىندى اتتەستاسيادان وتەدى» – دەپ ءتۇسىندىردى مينيستر.
اتالعان نورمالار كەلەسى جىلدان باستاپ كۇشىنە ەنەتىنىنە قاراماستان، بيىل ۇبت ناتيجەلەرى بويىنشا «ۇزدىك» بەلگىسىن بەرۋدىڭ وبەكتيۆتىلىگى باعالاناتىن بولادى. مينيستر وسىعان وراي مەكتەپ اكىمشىلىكتەرى، ءبىلىم بولىمدەرى مەن باسقارمالارى قورىتىندى ەمتيحانداردى وتكىزۋدىڭ اشىقتىعى مەن وبەكتيۆتىلىگىن قامتاماسىز ەتۋى ءتيىس ەكەنىن اتاپ ءوتتى.