ۇسىنىلعان 306 كينوجوبانىڭ ىشىنەن 48 جوبا ىرىكتەلدى.
7-11 قىركۇيەك ارالىعىندا الماتى قالاسىندا 7th BAIQONYR International Short Film Festival وتەدى، دەپ حابارلايدى Almaty-akshamy.kz
Baiqonyr - قازاقستاننىڭ شىعارماشىل جاستارىن حالىقارالىق دەڭگەيدە ىلگەرىلەتۋگە تۇراقتى قولداۋ كورسەتىپ كەلە جاتقان ەلىمىزدەگى العاشقى قىسقامەتراجدى حالىقارالىق كينوفەستيۆال.
التى جىل ىشىندە Baiqonyr-عا 11 مىڭنان استام كورەرمەن كەلدى، ولار 240-تان استام ءفيلمدى تاماشالادى. ىرىكتەۋ كوميسسياسى 1168 ءوتىنىمدى قارادى، ال فەستيۆالدىڭ قازىلار القاسى 62 لاۋرەاتتى ماراپاتتادى. فەستيۆالدە جەتى جىل بويى وتاندىق كينەماتوگرافتىڭ جاڭا ەسىمدەرى انىقتالىپ كەلەدى.
بيىل فەستيۆال وسى جىلدىڭ كوپتەن كۇتكەن فيلمدەرىنىڭ ءبىرى - اتى اڭىزعا اينالعان «دوس-مۇقاسان» ءانسامبلىنىڭ قۇرىلۋ تاريحىن باياندايتىن «دوس-مۇقاسان» (رەجيسسەر ايدىن ساحامان، «Aray Media Group» شىعارعان) ءفيلمىنىڭ پرەمەراسىمەن اشىلادى. ال فەستيۆالدىڭ جابىلۋىندا دارەجان ومىربايەۆتىڭ «سوڭعى سەانس» اتتى كارتيناسى كورسەتىلەدى، ونىڭ الەمدىك پرەمەراسى جاقىندا عانا شۆەيساريانىڭ لوكارنو قالاسىندا وتكەن بەدەلدى كينوفەستيۆالدە كورسەتىلدى.
الداعى فەستيۆالدىڭ باعدارلاماسى ءۇش كونكۋرستان تۇرادى – ۇلتتىق (كوركەم جانە دەرەكتى قىسقا مەتراجدى فيلمدەر)، حالىقارالىق (كوركەم جانە دەرەكتى قىسقا مەتراجدى فيلمدەر) جانە انيماسيالىق.
«ۇسىنىلعان 306 كينوجوبانىڭ ىشىنەن كينوتانۋشىلار ەرجان جۇمابەكوۆ، ەڭلىك ەگەۋبايەۆا، اقەركە قاماشبەك، رەجيسسەر رايىمبەك ءالجانوۆ جانە رەجيسسەر-انيماتور يۆان ارداشوۆتان تۇراتىن ءبىزدىڭ باعدارلامالىق قىزمەت فەستيۆالگە قاتىسۋ ءۇشىن 48 جوبانى ىرىكتەپ الدى. سونداي-اق بيىل فەستيۆالگە قىرعىزستاننان كەلگەن «ەكسپەديسيا» قوزعالىسى قاتىسادى. بۇل قازىرگى زامانداستارى، قاراپايىم ادامدار، ولاردىڭ پروبلەمالارى مەن ارماندارى تۋرالى قىسقا مەتراجدى فيلمدەر تۇسىرەتىن ءارتۇرلى رەجيسسەرلەر توبى. قوزعالىسقا 50-گە جۋىق جاس رەجيسسەر قاتىسادى»، - دەيدى كينوفەستيۆال پرەزيدەنتى ءانۋار كەنجەبايەۆ.
ءداستۇرلى تۇردە Baiqonyr فەستيۆالىنىڭ ۇيىمداستىرۋشىسى ەلىمىزدىڭ جەتەكشى كينوپورتالى – «برودۆەي» (brod.kz). فەستيۆالدىڭ نەگىزگى الاڭى – «ارمان» كينوورتالىعى.
فەستيۆال تمد-عا قاتىسۋشى مەملەكەتتەردىڭ مەملەكەتارالىق گۋمانيتارلىق ىنتىماقتاستىق قورىنىڭ قولداۋىمەن وتەدى. اقپاراتتىق قولداۋدى «Kazakh Tourism» ۇلتتىق كومپانياسى» اق كورسەتەدى.
فەستيۆالدىڭ اقپاراتتىق سەرىكتەستەرى «حابار» جانە El Arna تەلەارنالارى، «جۇلدىز FM» جانە «ەلدوراديو الماتى» راديوستانسيالارى، Tengrinews.kz، Massaget.kz، Baribar.kz، 365 Info.kz، «ەكسپرەسس ك» ينتەرنەت پورتالدارى، Egemen Qazaqstan، «كازاحستانسكايا پراۆدا»، Almaty Aqshamy، «ۆەچەرنيي الماتى» جانە «كومسومولسكايا پراۆدا كازاحستان» باسىلىمدارى.