ول 13 جاستاعى جەرگىلىكتى تۇرعىن بولىپ شىقتى
الماتى وبلىسىندا تەرروريزم اكتىسى تۋرالى جالعان حابارلاما بەرگەن ءجاسوسپىرىم ۇستالدى. 30 قاراشادا تالعار اۋداندىق پوليسيا باسقارماسىنىڭ كەزەكشى بولىمىنە كوللەدجدەردىڭ بىرىندە تەرروريزم اكتىسى بولاتىنى جايىندا اقپارات كەلىپ تۇسكەن، دەپ حابارلايدى Almaty-akshamy.kz Zakon.kz-كە سىلتەمە جاساپ.
وقيعا ورنىنا ساپەرلەر، كينولوگتار جانە باسقا دا ماماندار شاقىرىلىپ، عيمارات تۇگەل تەكسەرىلگەن. اقپارات راستالمادى.
بۇل قۇقىقبۇزۋشىلىق تالعار اۋدانى پوليسيا باسقارماسىندا ق ر قك 273-بابى "تەرروريزم اكتىسى تۋرالى كورىنەۋ جالعان حابارلاما" بويىنشا تىركەلدى. جەدەل-ىزدەستىرۋ جۇمىستارى بارىسىندا پوليسيا قىزمەتكەرلەرى الماتى وبلىسى بويىنشا ۇقكد-مەن بىرلەسىپ كۇدىكتىنىڭ جەكە باسىن انىقتادى. ول 13 جاستاعى جەرگىلىكتى تۇرعىن بولىپ شىقتى.
قازىرگى ۋاقىتتا تەرگەۋشىلەر كامەلەتكە تولماعان بالانىڭ زاڭدى وكىلدەرى مەن پسيحولوگتاردىڭ قاتىسۋىمەن بارلىق قاجەتتى تەرگەۋ ارەكەتتەرىن جۇرگىزىپ جاتىر.
تەرروريزم اكتىسى تۋرالى كورىنەۋ جالعان حابارلاعانى ءۇشىن بەس مىڭ ايلىق ەسەپتىك كورسەتكىشكە دەيىنگى مولشەردە ايىپپۇل (بۇگىندە 14،5 ملن تەڭگە) نە سول مولشەردە تۇزەۋ جۇمىستارى تۇرىندەگى جازا، سونىمەن بىرگە بەس جىلعا دەيىنگى مەرزىمگە شەكتەۋ نەمەسە باس بوستاندىعىنان ايىرۋ كوزدەلگەن.