الماتىدا «دوستىق ۇيىندە» يۋنەسكو جانە يسەسكو ىستەرى جونىندەگى ق ر ۇلتتىق كوميسسياسى، تۇركى مادەنيەتى مەن مۇراسى قورى، ق ر بەيزاتتىق مادەني مۇرا جونىندەگى ۇلتتىق كوميتەتى جانە م.و.اۋەزوۆ اتىنداعى ادەبيەت جانە ونەر ينستيتۋتى 2024 جىلى 17-18 قازاندا «تۇركى حالىقتارىنىڭ رۋحاني مۇراسى الەمدىك وركەنيەت اياسىندا: «الپامىس باتىر» جىرى» اتتى حالىقارالىق عىلىمي-تەوريالىق كونفەرەنسيا ءوتىپ جاتىر، دەپ حابارلايدى aqshamnews.kz ءتىلشىسى.
كونفەرەنسيا بارىسىندا «الپامىس باتىر» جىرىنىڭ قازاق، ورىس جانە اعىلشىن تىلدەرىندەگى باسىلىمى تانىستىرىلدى. سونىمەن قاتار تۇركى حالىقتارىنا ورتاق مۇرا رەتىندە وسى جىردى يۋنەسكو كولەمىندە ماتەريالدىق ەمەس مادەني مۇرا تىزىمىنە ەنگىزۋ جونىندەگى ماسەلە تالقىعا ءتۇستى.
القالى جيىنعا تۇركيا، ازەربايجان، رەسەي فەدەراسياسى (ۋفا، قازان، نوۆوسيبيرسك)، قىرعىز رەسپۋبليكاسى، وزبەكستان ەلدەرىنىڭ جانە قازاقستاننىڭ تانىمال ەپوستانۋشى فولكلوريست عالىمدارى قاتىسىپ، تومەندەگى تاقىرىپتار بويىنشا بايانداما جاساپ باستادى. دالىرەك:
● «الپامىس باتىر» جىرىنىڭ ۇلتتىق جانە الەمدىك كەڭىستىكتەگى تاريحي-مادەني جانە عىلىمي ماڭىزى؛
● ەپيكالىق تۋىندىلارداعى الەمنىڭ سەميوتيكالىق جانە تىلدىك بەينەسى؛
● ەپيكالىق ءداستۇر جانە جىرشىلىق ونەر: وتكەنى مەن بۇگىنى؛
● «الپامىس باتىر» جىرىن زەرتتەۋدىڭ ءپانارالىق ءتۇرلى اسپەكتىلەرى؛
● «الپامىس باتىر» جىرىنىڭ تۇركىلىك نۇسقالارىنىڭ ەرەكشەلىكتەرى؛
● فولكلورلىق مۇرا جانە قازىرگى زامان.
كونفەرەنسياعا قاتىسۋعا وتاندىق جانە شەتەلدىك عالىمدار، ەپوستانۋشىلار، فولكلورتانۋشىلار، ءتىلتانۋشىلار، ادەبيەتتانۋشىلار، تاريحشىلار، ونەرتانۋشىلار، فيلوسوفتار، مادەنيەتتانۋشىلار، جوو وقىتۋشىلارى شاقىرىلدى.
كونفەرەنسيا مودەراتورى ق ر ۇعا اكادەميگى، م.و.اۋەزوۆ اتىنداعى ادەبيەت جانە ونەر ينستيتۋتى باس ديرەكتورى كەنجەحان ءىسلامجان ۇلى ءوز سوزىندە:
«الپامىس باتىر» جىرىن الەمدىك دارەجەگە كوتەرۋ قاجەت. جالپى بۇل جىرلاردى كەڭەستىك كەزەڭدە الەمدىك قاۋىمداستىق الدىندا تانىتۋ، تاراتۋ، زەرتتەۋ ءبىزدىڭ الدىمىزعا قويىلماعان-تۇعىن. بۇگىندە يۋنەسكو قاتارىنا قوسىلعاننان كەيىن، رۋحاني مۇرالارىمىزدى الەمدىك دەڭگەيدە كوتەرىپ ءوز ورنىمىزدى الۋىمىز كەرەك. بۇل ماسەلەلەر توڭىرەگىندە ىستەلەتىن جۇمىستار جەتەرلىك. بۇل جۇمىسىمىزدىڭ باستاۋى دەپ ەسەپتەيمىز. مۇنداي حالىقارالىق جيىنداردى جۇيەلى تۇردە وتكىزگەن ءجون، – دەدى.
ءىس-شارانىڭ ءمان-ماعىناسى تۋرالى وي-پىكىر ايتىلدى.
"الماتىدا تۇركى مادەنيەتىنە بايلانىستى وتە كەرەمەت جيىن باستالدى. ماتەريالدىق ەمەس قۇندىلىقتاردى زەرتتەپ دارىپتەۋ بويىنشا ەڭ ءبىر ماڭداي الدى عالىمدار باس قوسىپ وتىر. ءىس-شارا ماقساتى – تۇركى مادەنيەتىن قورعاۋ، دۇنيەگە ناسيحاتتاۋ. بۇل يگى باستاما دۇنيەجۇزىنە بەلگىلى «الپامىس باتىر» جىرىنان باستاۋ الادى. قۇندى رۋحاني مۇرالاردى دارىپتەي بەرگەن ءجون"، – دەدى تۇركى مادەنيەتى جانە مۇراسى قورى باسشىسى اقتوتى رايىمقۇلوۆا.