كوشە جارىعىنىڭ قازىرگى جاعدايىنا قاتىستى تۇرعىنداردان كوپ سۇراق كەلىپ تۇسۋدە.
بۇل تۋرالى قالا اكىمى ەربولات دوسايەۆ المالى اۋدانى تۇرعىندارىمەن وتكەن كەزدەسۋىندە ايتتى، دەپ حابارلايدى Almaty-akshamy.kz.
«جارىقتىڭ ءجيى ءوشۋى، ىركىلىستەر، كەلىپ تۇسكەن وتىنىمدەردى ورىنداۋ جىلدامدىعىنا قاناعاتتانباۋ ورىن الۋدا. اتاپ ايتقاندا، المالى اۋدانى بويىنشا كۇتۋ ۋاقىتى 2 ايعا دەيىن جەتكەن، ال قىزمەت كورسەتۋ ۇيىمى تەك 1 اۆاريالىق بريگادانى قىزمەتكە تارتقان»، - دەدى قالا باسشىسى ە.دوسايەۆ.
1 تامىزدان باستاپ اۋدان «الماتىقالاجارىق» اكسيونەرلىك قوعامىمەن اۋداننىڭ كوشە جارىعىنا قىزمەت كورسەتۋ بويىنشا دەربەس شارت جاساستى، اتالعان كومپانيا وتكەن ايدا جۇمىسىن قارقىنداتىپ، تۇرعىنداردىڭ 50-دەن استام ءوتىنىمىن ورىندادى (21 اۆاريالىق، 30 اۋلا جارىعى)، تولە بي (46%-كە اياقتالدى، مەرزىمى - 15 قىركۇيەككە دەيىن)، گوگول (58%، قىركۇيەك ايىنىڭ سوڭىنا دەيىن) كوشەلەرىندە، اباي داڭعىلىندا (جۇمىس باستالدى، قىركۇيەك ايىنىڭ سوڭىنا دەيىن اياقتالادى) جارىقتاندىرۋدى قالپىنا كەلتىرۋ جۇمىستارىن جۇرگىزدى. اۆاريالار كەزىندە 7 بريگادا كۇن سايىن شىعىپ، وتىنىمدەردى ورىنداۋ ۋاقىتى 5 كۇنگە دەيىن قىسقاردى.