ەلەنا رىباكينا الەمنىڭ ەڭ تابىستى سپورتشىلارىنىڭ قاتارىنا كىردى

قازاقستاننىڭ ءبىرىنشى، الەمنىڭ بەسىنشى راكەتكاسى ەلەنا رىباكينا ەڭ تابىستى سپورتشىلاردىڭ قاتارىنا ەندى، - دەپ حابارلايدى اqshamnews.kz ءتىلشىسى. 

Sportico جۋرنالىنىڭ دەرەگىنە سۇيەنسەك، رىباكينا 2025 جىلى 12،6 ملن دوللار تابىس تاۋىپ، ەڭ كوپ تابىس تاپقان 15 ايەل سپورتشىنىڭ ىشىندە توعىزىنشى ورىنعا تۇراقتاعان.

رەيتينگتىڭ كوشىن ەكى دۇركىن «ۇلكەن دۋلىعا» چەمپيونى، الەمنىڭ ءۇشىنشى راكەتكاسى كورري گاۋفف باستاپ تۇر — ونىڭ جىلدىق كىرىسى 31 ملن دوللار، سونىڭ 23 ميلليونى دەمەۋشىلىك كەلىسىمدەردەن تۇسكەن.

ەكىنشى ورىندا الەمنىڭ ءبىرىنشى راكەتكاسى، بەلارۋستىق ارينا سابالەنكا - 30 ملن دوللار تابىسپەن. ال ۇزدىك ۇشتىكتى التى مارتە «ۇلكەن دۋلىعا» جەڭىمپازى، الەمنىڭ ەكىنشى راكەتكاسى يگا سۆونتەك تۇيىندەدى - ونىڭ جىلدىق تابىسى 23،1 ملن دوللار بولعان.

ايتا كەتەيىك، ەلەنا رىباكينا جۋىردا ەر-ريادتە وتكەن ماۋسىمنىڭ قورىتىندى تۋرنيرىندە تاماشا ونەر كورسەتىپ، فينالدا ارينا سابالەنكانى ايقىن باسىمدىقپەن جەڭدى. وسى ءتۋرنيردىڭ ناتيجەسىندە ول 5،235 ملن دوللار (شامامەن 2،7 ملرد تەڭگە) سىياقى يەلەندى. بۇل - ايەلدەر تەننيسى تاريحىنداعى ءبىر تۋرنير ءۇشىن بەرىلگەن ەڭ ءىرى جۇلدە.

بۇل جەڭىس رىباكينانىڭ 2022 جىلعى ۋيمبلدونداعى تاريحي تريۋمفىنان كەيىنگى ەڭ ۇلكەن جەتىستىگى.