«الماتىنىڭ تۋريستىك يميدجىنە ءقاۋىپ ءتونىپ تۇر. تۋريستەر ىنساپسىز تاكسيستەردىڭ قۇربانى بولۋدا». وسىلاي دەپ دابىل قاققان كاسىپكەرلەر ءتيىستى شارالار جۇرگىزۋ كەرەك ەكەنىن ايتتى، دەپ حابارلايدى Almaty-akshamy.kz.
Azattyq Ruhy-نىڭ اقپاراتى بويىنشا، الماتى حالىقارالىق اۋەجايىندا «اتامەكەن» كاسىپكەرلەر پالاتاسى قالالىق باسقارمالاردىڭ باسشىلارىمەن كەزدەسۋ وتكىزدى. كەزدەسۋ ماقساتى – تاكسي جۇرگىزۋشىلەرىنە قاتىستى وزەكتى ماسەلەلەردى شەشۋ بولدى.
«بيىل الماتىعا تۋريستەر كوپ كەلەدى دەپ بولجانىپ وتىر. وسىعان وراي، تۋريستىك ماۋسىمدا قوناقتار اعىنىن شەكتەيتىن كەز كەلگەن ماسەلەلەردى ەڭسەرۋ كەرەك. وسى ماسەلەلەردىڭ ءبىرى – جول اقىسىن اسىرا الاتىن تاكسي جۇرگىزۋشىلەرى. بۇل اۋەجايدا تۇراقتى تۇردە جۇمىس جاسايتىن جۇرگىزۋشىلەر ەمەس، ءبىر رەت كەلىپ، زاڭسىز اقشا تابۋدى شەشكەندەر. بۇل ماسەلە شۇعىل شەشىمدى قاجەت ەتىپ تۇر»، - دەيدى كاسىپكەرلەر.
سوندىقتان جيىندا قوناقۇيلەر مەن باسقا دا تۋريستىك ورىنداردا اقپاراتتىق انىقتامانى تاراتۋ قاجەت دەگەن قورىتىندىعا كەلدى. ياعني، شەتەلدىك قوناق تاكسي جۇرگىزۋشىسىمەن كيكىلجىڭگە تاپ بولسا، ءتيىستى انىقتاما ارقىلى كىمگە حابارلاسىپ، قالاي ارىز جازۋ كەرەك ەكەنىن بىلەتىن بولادى.
ايتا كەتەرلىگى، الماتى اۋەجايىندا شەتەلدىك ازاماتتاردىڭ الدىنان كەسە كولدەنەڭدەپ شىعىپ، ءوز قىزمەتىن ماجبۇرلەپ ۇسىناتىن، ونىمەن قويماي، جولاقى ءۇشىن ويعا قونىمسىز اقشا سۇرايتىن تاكسي جۇرگىزۋشىلەرىنە قاتىستى دەرەكتەر ءجيى جاريالانىپ جاتىر. ماسەلەن، كۇنى كەشە عانا شەتەل ازاماتتارىن جەتكىزىپ، جول اقىسىنا 800 اقش دوللارىن العان تاكسي جۇرگىزۋشىسىنىڭ قىلمىستىق جاۋاپكەرشىلىككە تارتىلعانى حابارلاندى.