تۋريستەر الماتىنى نە ءۇشىن تاڭدايدى؟
وسىنى انىقتاۋ ءۇشىن 1200 شەتەلدىك تۋريسكە ساۋالناما جۇرگىزۋ جوسپارلانۋدا، دەپ حابارلايدى Almaty-akshamy.kz Ulysmedia.kz-كە سىلتەمە جاساپ.
بۇل جونىندە مەملەكەتتىك ساتىپ الۋلار پورتالىندا جاريالانعان حابارلاندىرۋدان بەلگىلى بولدى.
"تاپسىرىس بەرۋشى – "الماتى قالاسىنىڭ تۋريستىك اقپاراتتىق ورتالىعى" جاۋاپكەرشىلىگى شەكتەۋلى سەرىكتەستىگى، سيپاتتاماسى – "ءتۋريستىڭ پورترەتى" زەرتتەۋى، سوماسى – 35 ملن تەڭگە"، – دەلىنگەن لوت حابارلاندىرۋ سيپاتتاماسىندا.
Visit Almaty – تۋريستىك اقپاراتتىق ورتالىق جانە 2017 جىلى قۇرىلعان ماركەتينگتىك كومپانيا. ورتالىقتىڭ جارعىلىق كاپيتالىنا قاتىسۋ ۇلەسىنىڭ 100%-ى الماتى اكىمدىگىنە تيەسىلى.
Visit Almaty كومپانياسىنىڭ پىكىرىنشە، كوروناۆيرۋس، پاندەميا جانە گەوساياسي وزگەرىستەر الماتىدا ءتۋريزمنىڭ دامۋىنا اسەر ەتۋدى جالعاستىرۋدا، سوندىقتان ساۋالناما، سۇحبات جانە قولدانىستاعى ستاتيستيكالىق دەرەكتەردى تالداۋ نەگىزىندە شەتەلدىك ءتۋريستىڭ ءپروفيلىن انىقتاۋ قاجەت.
كومپانيا تۋريستەر نەگە الماتىنى تاڭدايتىنىن، وڭتۇستىك استانادا قايدا جانە قالاي دەمالعاندى ۇناتاتىنىن انىقتاۋعا نيەتتى.
35 ملن تەڭگەگە قازىرگى جاعدايدى زەردەلەۋ، الەمدىك تاجىريبەلەردى تالداۋ، حالىقارالىق ۇيىمداردىڭ ءادىسنامالارىنا شولۋ جانە تالداۋ، تانىمال تۋريستىك ورىنداردا كەمىندە 1200 شەتەلدىك تۋريسكە ساۋالناما جۇرگىزۋ جوسپارلانۋدا.
تەحنيكالىق سيپاتتاماعا سايكەس قىزمەت كورسەتۋ مەرزىمى – 2023 جىلدىڭ سوڭىنا دەيىن. كومپانيا تۇسكەن وتىنىمدەردى قاراپ جاتقانعا ۇقسايدى.