كۇردەلى وتا 3 ساعاتتا اياقتالدى.
الماتىلىق دارىگەرلەر كولىگىن جوندەۋ بارىسىندا وڭ كوزىنە مەتالل سىنىعى تۇسكەن 62 جاستاعى ەر ازاماتتىڭ جانارىن ساقتاپ قالدى، دەپ حابارلايدى Almaty-akshamy.kz
ورتالىق قالالىق كلينيكالىق اۋرۋحانا دارىگەرلەرى مىندەتتى الەۋمەتتىك مەديسينالىق ساقتاندىرۋ ەسەبىنەن كوزگە جوعارى تەحنولوگيالىق وپەراسيالار جاسايدى. بيىل جىل باسىنان بەرى وفتالمولوگيا بولىمشەسىندە 450-گە جۋىق وپەراسيا جاسالىپتى.
"مەتالل سىنىعى كوزدىڭ بارلىق قاباتىنان ءوتىپ، كوز وربيتاسىنىڭ ىشىنە، جاناردىڭ جۇيكە تامىرلارى ورنالاسقان تۇسىنا قادالعان. وتا بارىسىندا مەتالل الىنىپ، جاراقاتتىڭ سالدارىنان بولاتىن مەنينگيت پەن سەپسيستىڭ الدىن الدىق. كۇردەلى وتا 3 ساعاتتا اياقتالدى. جالپى مۇنداي وتا اسقان شەبەرلىكتى، زەرگەرگە ءتان دالدىكتى تالاپ ەتەدى. ويتكەنى وپەراسيا بارىسىندا كوزدەگى شىنىاينەكتىڭ پىشىنىنە تيتتەي دە زاقىم كەلمەۋى ءتيىس"، - دەيدى وفتالمولوگيا بولىمشەسىنىڭ مەڭگەرۋشىسى گۇلزات ءابدىرايىموۆا.
جوعارى تەحنولوگيالار مەن بىلىكتى ماماندار پاسيەنتتىڭ كوز جانارىن ساقتاپ قالدى. ءقازىر ەمدەلۋشىنىڭ جاعدايى جاقسى، كورۋ قابىلەتى قالپىنا كەلدى. ءبىراق ول الداعى ۋاقىتتا كوز دارىگەرلەرىنىڭ باقىلاۋىندا بولۋى كەرەك.