الماتىدا مەدەۋ اۋدانىنىڭ تۇرعىندارى قالا اكىمىمەن كەزدەسۋ بارىسىندا تاۋ باۋرايىندا ءۇي قۇرىلىسى قارقىندى ءجۇرىپ، الما باقتارى كەسىلىپ جاتقانىن ايتتى.
ولاردىڭ پىكىرىنشە، مۇنىڭ ارتى تابيعي اپاتقا اكەلۋى مۇمكىن، دەپ حابارلايدى Almaty-akshamy.kz قازاقپاراتقا سىلتەمە جاساپ.
«تاۋ باۋرايىنداعى قۇرىلىس ماسەلەلەرى بويىنشا ءبىز دۇيسەنبى كۇنى ءماسليحاتتىڭ سەسسياسىن وتكىزەمىز. سول كەزدە قۇرىلىس ەرەجەلەرى تۋرالى شەشىم قابىلدانادى. ەڭ باستىسى، تاۋ بوكتەرىندە قۇرىلىس سالۋعا تىيىم سالىنادى»، - دەپ جاۋاپ بەردى الماتى اكىمى ەربولات دوسايەۆ.
«كامەنسكايا پلاتا» ىقشاماۋدانىنىڭ تۇرعىندارى باۋ-باقشا ەگۋ اۋماعىن قايتارۋدى، سونداي-اق زاڭسىز بەرىلگەن جەر تەلىمدەرىن قايتا راسىمدەۋ جۇمىستارىن جۇرگىزۋدى سۇرادى.
«بۇل ماسەلە وتە كۇردەلى جانە ونى شەشۋ مۇمكىن ەمەس. جەرگە مەنشىك قۇقىعى تۋرالى اكتىلەردىڭ بارلىعى بىزگە اۋماقتى قوسىپ العان كەزدە نەگىزىنەن تالعار اۋدانىنان بەرىلدى. ولاردىڭ ءتيىستى زاڭدى كۇشى بار. بۇل ماسەلەنى تولىعىمەن شەشە المايمىز. بۇل تالعار اۋدانىنا عانا قاتىستى ەمەس، ناۋرىزباي مەن الاتاۋعا قوسىلعان جاڭا ايماقتار بار. اركىمنىڭ ءىسى بار. ولار قالانىڭ ءبىر بولىگىنە اينالدى. كەلەڭسىز جاعداي بولماس ءۇشىن ءتيىستى جۇمىستار جۇرگىزىلەتىن بولادى»، - دەدى اكىم.