ازىرگە ءموبيلدى پاترۋلدەر سىناق تۇرىندە قالانىڭ مەدەۋ اۋدانىندا عانا جۇمىس ىستەپ ءجۇر.
بولاشاقتا شاھاردىڭ بارلىق ساياباعىن ساموكاتپەن پاترۋلدەيتىن ۇشقىر توپتاردى جاساقتاۋ جوسپارى بار. ءقازىر پوليسيا قىزمەتكەرلەرى بىرنەشە جاياۋ جۇرگىنشىلەر اۋماعىنداعى ءتارتىپتى قاداعالاپ، تۇرعىندارعا ەلەكتر كولىگىمەن ءجۇرۋدىڭ ەرەجەسىن ءتۇسىندىرىپ جاتىر، دەپ حابارلايدى Almaty-akshamy.kz 24.kz-كە سىلتەمە جاساپ.
جاڭا زاڭ قولدانىسقا ەنگەن سوڭ ەلەكتر ساموكاتىن پايدالانۋشىلار ۆەلوسيپەد جولدارىمەن جانە جول جيەگىمەن ەشبىر شەكتەۋسىز جۇرە الادى. ال جاياۋ جۇرگىنشى جولىنا تۇسسەڭىز جىلدامدىقتى ساعاتىنا 6 شاقىرىمنان اسىرماۋ قاجەت. ەكى دوڭگەلىكتى كولىككە مىنگەن ءموبيلدى توپتار ازىرگە مەدەۋ اۋدانىنداعى تەررەنكۋر ساياباعىنداعى ءتارتىپتى باقىلاۋدا. پوليسيا وكىلدەرى بۇل ماڭايدى جاياۋ پاترۋلدەۋ قيىن بولعانىن ايتادى. سەبەبى، ءتارتىپ بۇزعاندار جەلدەي جۇيتكىپ ساموكاتپەن ۇستاتپاي كەتەدى ەكەن.
«باستالعالى بەرى بىزدە كۇنىنە كەزەكشىلىككە ءۇش قىزمەتكەر تۇسەدى. ءۇش قىزمەتكەر تاڭعى ساعات 9-دان كەشكى ساعات 4-كە دەيىن جۇرەدى. ارينە ءتارتىپ بۇزاتىندار وتە كوپ. اسىرەسە جاستارىمىز، ستۋدەنتتەر. سولارعا ەسكەرتىپ جول شەتىمەن ءجۇرۋ جونىندە ءتۇسىندىرۋ جۇمىستارى جۇرگىزىلىپ جاتىر. تاجىريبە قار تۇسكەنگە دەيىن جالعاسادى. وڭ ناتيجە بەرسە مۇنداي پاترۋلدەر قالانىڭ بارلىق اۋداندارىندا جۇمىس ىستەيدى»، -دەيدى مەدەۋ اپب جەرگىلىكتى پوليسيا باستىعى ادىلبەك قازىبەك.
بۇل باستامانى قالا تۇرعىندارىدا قۇپتاپ وتىر.
«مۇنداي ءپاترۋلدىڭ جۇمىسىن قولدايمىن. سەبەبى ماشينامەن ءجۇرىپ ساياباق، وزەن جاعاسىن باقىلاۋ قيىن. ال بالالاردىڭ ساموكاتتى قاتتى تەبەتىنى جاسىرىن ەمەس. جاستار قاۋىپسىزدىككە ءمان بەرمەيدى»، - دەيدى قالا تۇرعىنى نازارباەك نالىبايەۆ.
ءتارتىپ بۇزعان ەلەكتر ساموكاتىن مىنگەن ازاماتتارعا 7 مىڭ تەڭگەگە دەيىن ايىپپۇل سالىنۋى مۇمكىن. اكىمشىلىك كودەكستىڭ 615-بابىمەن وسىنداي جاۋاپكەرشىلىك كوزدەلگەن. ەگەر وزگە كولىكپەن سوقتىعىسىپ نەمەسە ادام قاقسا ساموكات جۇرگىزۋشىسى بۇدان 5 ەسە كوپ ايىپپۇل تولەيدى. جىل باسىنان بەرى الماتىدا ساموكات مىنگەندەردىڭ قاتىسۋىمەن 18 جول-كولىك وقيعاسى تىركەلگەن. وكىنىشكە وراي بىرەۋى ادام ولىمىمەن اياقتالعان.