تاۋاردىڭ كەدەندىك قۇنى – 25،3 ملن تەڭگە.
الماتى اۋەجايىنا iPhone 15 تەلەفوندارى كونتراباندالىق جولمەن اكەلىنگەن، دەپ حابارلايدى Almaty-akshamy.kz مەملەكەتتىك كىرىستەر كوميتەتىنە سىلتەمە جاساپ.
بيىل 22 قىركۇيەكتە «دۋباي-الماتى» رەيسىن كەدەندىك باقىلاۋ كەزىندە جەكە تۇلعانىڭ دەكلاراسيالانباعان 34 دانا iPhone 15 تەلەفونىن زاڭسىز اكەلۋ دەرەگىنىڭ جولى كەسىلدى. تەلەفونداردىڭ الدىن-الا ەسەپتەلگەن كەدەندىك قۇنى – 25،3 ملن تەڭگە، كەلتىرىلگەن شىعىن كولەمى – 3،1 ملن تەڭگە.
زاڭ بۇزۋشىلىقتى الماتى قالاسىنىڭ «جەتىسۋ» كەدەن بەكەتىنىڭ ماماندارى، الماتى قالاسى بويىنشا ەكونوميكالىق تەرگەۋ دەپارتامەنتىنىڭ جانە ۇقك شەكارا قىزمەتى الماتى شەكارالىق باقىلاۋ باسقارماسىنىڭ قىزمەتكەرلەرىمەن بىرلەسىپ، الماتى قالاسى اۆياسيالىق كولىك پروكۋراتۋراسىنىڭ ۇيلەستىرۋىمەن انىقتادى.
ۇيالى تەلەفوندار جەكە تاۋارلار ساناتىنا جاتادى جانە جەكە تۇلعالار ونى كەدەندىك شەكارا ارقىلى وتكىزگەن كەزدە ولاردىڭ سانى ءبىر ادامعا ەكى دانادان اسپاۋعا ءتيىس (قارجى مينيسترلىگىنىڭ 2015 جىلعى 31 ناۋرىزداعى №250 بۇيرىعى).
تاركىلەنگەن تاۋارلار كەدەندىك راسىمدەۋدەن ءوتۋ جانە رۇقسات قۇجاتتارىن جاساتۋ ءۇشىن ۋاقىتشا ساقتاۋ قويماسىنا جىبەرىلدى.
ۇيالى تەلەفونداردى دەكلاراسيالاۋسىز اكەلۋگە ارەكەت جاساعان ادامعا اكىمشىلىك قۇقىقبۇزۋشىلىق تۋرالى كودەكستىڭ 551-بابى 1-بولىگىنە سايكەس 103،5 مىڭ تەڭگە (30 اەك) ايىپپۇل سالىنادى.
مكك الماتى قالاسى بويىنشا دەپارتامەنتى قازاقستاندىقتاردى الماتى حالىقارالىق اۋەجايىنىڭ جولاۋشىلار تەرمينالىندا تىيىم سالىنعان جانە شەكتەلگەن تاۋارلارعا، ونىڭ ىشىندە اسكەري جانە قوسارلى ماقساتتاعى تاۋارلاردىڭ قوزعالىسىنا كەدەندىك باقىلاۋدىڭ كۇشەيگەنىن ەسكەرتەدى.