الماتى اكىمى پانفيلوۆ كوشەسىنەن باستاپ بوس جاتقان اۋماقتاعى جاڭا سكۆەرگە دەيىن المالى اۋدانىنداعى جاڭارتىلعان ايماقتاردى ارالاپ كوردى، دەپ حابارلايدى aqshamnews.kz
پانفيلوۆ جاياۋ جۇرگىنشىلەر كوشەسى جاڭا كەيىپكە ەندى. بيىل قىركۇيەك ايىندا پانفيلوۆ كوشەسىنىڭ قابانباي باتىر كوشەسىنەن جىبەك جولى كوشەسىنە دەيىنگى ارالىعىندا جوندەۋ جۇمىستارى باستالدى. بۇل جۇمىس كەيبىر جەرلەردە تروتۋار پليتالارىنىڭ جارىلىپ، ورىندىقتاردىڭ، سۋارۋ جۇيەسىنىڭ جانە باسقا دا كورىكتەندىرۋ ەلەمەنتتەرىنىڭ جارامسىز بولۋىنا بايلانىستى قولعا الىنعان.
المالى اۋدانىنا جۇمىس ساپارى كەزىندە مەگاپوليس اكىمى ەربولات دوسايەۆ بۇل كوشەنىڭ قالا تۇرعىندارى مەن قوناقتارىنىڭ سۇيىكتى ورنى ەكەنىن اتادى. سول سەبەپتى جوندەۋ بارىسىندا ەستەتيكالىق جانە پراكتيكالىق تۇرعىدان ءاربىر بولشەككە ەرەكشە نازار اۋدارىلعان.
بۇگىنگى تاڭدا اۋدان اكىمدىگى 2000 شارشى مەتر تروتۋار پليتالارىن اۋىستىرىپ، 130 ورىندىق ورناتتى، 2 بالالار الاڭى سالىندى، 2،6 كم جارىقتاندىرۋ كابەلدەرى اۋىستىرىلىپ، 2 قۇرعاق سۋبۇرقاق جوندەلدى. سونىمەن قاتار، كوگالداندىرۋعا جانە جاسىل ايماقتار قۇرۋعا ەرەكشە كوڭىل ءبولىندى. جاسىل ايماق كولەمى 20%-عا ۇلعايتىلدى.
«بۇل اۋماقتى جاپون سپيرەياسى، شىعىس گ ۇلى جانە باسقا دا وسىمدىكتەردەن تۇراتىن 13 مىڭنان استام بۇتالار مەن كوپجىلدىق گۇلدەر كوركەيتەدى. ءبىز 39 جاڭا اعاش ەكتىك، ونىڭ ىشىندە ۇساق جاپىراقتى جوكە، ساندىك الما جانە المۇرت اعاشتارى بار. ەگىلگەن كوگالدى سۋىقتان جانە قۇستاردان قورعاۋ ءۇشىن ونى كاكاو قابىعىمەن جاپتىق. بۇل قابىق تىڭايتقىش رەتىندە قولدانىلادى جانە جاعىمدى ءيىس شىعارادى»، - دەدى مەردىگەر ۇيىم وكىلى مارگاريتا بالاكيريەۆا.
جاڭارتۋدان كەيىن كەڭىستىك ەرەكشە كورىككە يە بولىپ، قالا تۇرعىندارىنا جاعىمدى ەموسيا سىيلادى.
«ايىرماشىلىق بىردەن بايقالادى. تروتۋار تەگىس بولعاندىقتان، ءجۇرىپ-تۇرۋ الدەقايدا ىڭعايلى بولدى، ال كوشە ودان سايىن جايلى بولا ءتۇستى. ماماندار جاياۋ جۇرگىنشىلەر ايماعى كەز كەلگەن مەزگىلدە ادەمى كورىنۋى ءۇشىن بار كۇشىن سالعان»، - دەدى قالا تۇرعىنى.
اۋدان تۇرعىنى الينا كۋزنەسوۆا جاڭا قوندىرعىلار مەن بالالار الاڭشالارىنىڭ پايدا بولعانىنا ەرەكشە قۋانعانىن ايتتى.
«ءبىز مۇندا كۇندە دەرلىك سەرۋەندەيمىز. سۇيىكتى سۋبۇرقاقتارىمىزدى جوندەگەنى قۋانتادى. جالپى، ءبارى كەرەمەت جاسالعان، كوشە ودان سايىن ادەمىلەنە ءتۇستى»، - دەدى ول.
ەربولات دوسايەۆ ساپار بارىسىندا روزىباكييەۆ پەن دۇيسەنوۆ كوشەلەرىنىڭ قيىلىسىندا «حالىق قاتىساتىن بيۋدجەت» باعدارلاماسى اياسىندا سالىنعان جاڭا سكۆەرگە دە ات باسىن بۇردى.
بۇرىن 0،49 گەكتار اۋماق كاسىپكەرگە ۋاقىتشا جالعا بەرىلگەن بولاتىن. الايدا جەر ماقساتىنا ساي پايدالانىلماعاندىقتان، ول جەردە ستيحيالىق بازار پايدا بولىپ، جاقىن ماڭداعى ۇيلەردىڭ تۇرعىندارىنا قولايسىزدىق تۋعىزدى.
ەندى بۇل اۋماقتا جاياۋ جۇرگىنشىلەر جولدارى سالىندى، ورىندىقتار، قوقىس جاشىكتەرى، رەزەڭكە جابىنى بار بالالار مەن جاسوسپىرىمدەرگە ارنالعان ويىن الاڭدارى ورناتىلدى. سونداي-اق جارىقتاندىرۋ جۇيەسى جۇرگىزىلدى، اۆتوماتتى سۋارۋ جۇيەسى، كوگال جانە 3585 كوپجىلدىق بۇتا ەگىلدى.
«بۇرىن تاڭنان باستاپ تەرەزە الدىنان كولىكتەردىڭ شۋىلداعان داۋىسى ەستىلەتىن. جازدا ءتۇرلى جاعىمسىز يىستەرگە بايلانىستى تەرەزەنى اشۋ مۇمكىن ەمەس ەدى. اكىمدىك جابايى ساۋدانى رەتتەپ قانا قويماي، بۇل جەردى كورىكتەندىردى. بۇل جوبا ءبىزدىڭ اۋداننىڭ سانىنە اينالدى، ال تۇرعىندار، اسىرەسە بالالار، بوس ۋاقىتىن وسىندا وتكىزىپ ءجۇر»، - دەدى تۇرعىنداردىڭ ءبىرى اعىنان جارىلىپ.
ەربولات دوسايەۆ قالا تۇرعىندارىمەن كەزدەسۋدە شاھاردا دەمالۋ مەن سپورتپەن اينالىسۋعا ارنالعان ءقاۋىپسىز ءارى جاسىل قوعامدىق ورىنداردى قۇرۋ جۇمىستارى جالعاسا بەرەتىنىن جەتكىزدى.
ايتا كەتۋ كەرەك، «حالىق قاتىساتىن بيۋدجەت» باعدارلاماسىنا بيىل 18،8 ميلليارد تەڭگە ءبولىندى، بۇل وتكەن جىلمەن سالىستىرعاندا 5،8 ميلليارد تەڭگەگە كوپ. الماتى تۇرعىندارى اۋلالاردى، قوعامدىق ورىنداردى كورىكتەندىرۋ، سپورت جانە ويىن الاڭدارىن سالۋ بويىنشا 364 جوبانى ۇسىنۋ جانە جۇزەگە اسىرۋ مۇمكىندىگىنە يە بولدى.