مەملەكەتتىك قۋىرشاق تەاترى ەرەسەك كورەرمەندەرىنە ارناپ «مەن كىممىن؟» سپەكتاكلىنىڭ پرەمەراسىن ۇسىندى. ايتار ويى تەرەڭ ەرەكشە قويىلىم ادام جانىنىڭ قۇپيا الەمىنەن سىر شەرتەدى.
قوعامداعى رۋحاني جالعىزدىق، ادامدىق كەلبەتتى جوعالتۋ، وز-وزىمەن ارپالىسۋ سەكىلدى ىشكى قايشىلىقتاردى، ادام جانىنىڭ كۇيزەلىسكە ۇشىراۋىن قاۋزايتىن سپەكتاكل مازمۇنى قۋىرشاق ونەرىنىڭ مۇمكىندىكتەرى ارقىلى ءساتتى باياندالدى دەۋگە بولادى. باستى كەيىپكەردىڭ ىشكى جان ايقايى، قوعاممەن ۇيلەسىم تابا الماۋى جانە ءوزىن-وزى تانۋعا ۇمتىلىسى كورەرمەنىن تەرەڭ ويعا جەتەلەيدى.
ءيا، ادامنىڭ رۋحاني داعدارىسقا ۇشىراۋىن، ونىڭ ءوزىن كوپتىڭ ىشىنەن تابا الماي الاسۇرعان احۋالىن كوركەم تۇردە جەتكىزە بىلگەن «مەن كىممىن؟» سپەكتاكلىنىڭ رەجيسسەرى – الەمدىك قۋىرشاق تەاترى ونەرىندە وزىندىك قولتاڭباسى قالىپتاسقان، گۇرجىستان ەلىنەن ارنايى شاقىرتىلعان سۋرەتكەر نيكولوز ساباشۆيلي.
"مەن كىممىن؟» – قازىرگى قوعامداعى وزەكتى تاقىرىپتاردى كوتەرەتىن، كورەرمەن سۇرانىسىنا ساي سپەكتاكل دەپ ويلايمىن. ءبىز بۇل تۋىندى ارقىلى ادامدىق بولمىستىڭ مانىنە قايتا ءۇڭىلۋدى ۇندەيمىز. قۋىرشاق تەاترى – تەك بالالارعا ارنالعان ونەر ەمەس، ول كەز كەلگەن كۇردەلى يدەيانى نازىك ءارى تەرەڭ جەتكىزە الاتىن ساحنالىق ءتىل. پرەمەرا كورەرمەنگە ەرەكشە اسەر، تەرەڭ وي جانە رۋحاني تولعانىس سىيلادى دەپ سەنەمىز"، – دەيدى مەملەكەتتىك قۋىرشاق تەاترىنىڭ ديرەكتورى المات امانگەلدى.
سپەكتاكل سوڭىندا قۋىرشاق-كەيىپكەرلەردى شەبەر ويناتا بىلگەن ارتيستەرگە الماتى قالاسىنىڭ اكىمدىگى اتىنان ىقىلاس گ ۇلى تابىستالدى. ال نيكولوز ءساباشۆيليدىڭ يىعىنا تەاتر ۇجىمى قازاقى جولمەن شاپان جاپتى.
"بىرىنشىدەن، 90 جىلدىق بەلەستەن وتكەن قۋىرشاق تەاترىنىڭ كۇنى كەشە عانا «اكادەميالىق» مارتەبەسىن يەلەنگەن قۋانىشىمەن قۇتتىقتايمىن. جالپى، بۇگىنگىدەي تەرەڭ ويلى، جوعارى دەڭگەيدەگى جۇمىستار وسىلاي اكادەميالىق جۇدىرىق بولىپ جۇمىلعان ساتتە، ياعني ءبىرىڭىز قۋىرشاقتىڭ اياق-قولىن، ەكىنشىڭىز باسىن، كوزىن، ءۇشىنشىڭىز ويىن «سويلەتىپ» جاتقان كەزدە شىعادى عوي. ءبىر سپەكتاكلدىڭ ونە بويىندا قانشاما ارىپتەسىمنىڭ كاسىبي شەبەرلىگى، جانكەشتى ەڭبەگى، ماڭداي تەرى جاتىر دەسەڭىزشى! پرەمەرا قۇتتى بولسىن!" – دەدى م.اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن جۋاسبەك.