ەلىمىزدەگى ەرەسەك تۇرعىنداردىڭ شامامەن 21–22%-ى شىلىم شەگەدى. ەرلەر اراسىندا بۇل كورسەتكىش – 38%، ايەلدەر اراسىندا 6–10% شاماسىندا. ال 13–15 جاستاعى جاسوسپىرىمدەردىڭ 3%-ى تۇراقتى تۇردە تەمەكى شەگەدى ەكەن.
ءبىز تەمەكىنىڭ وكپەنىڭ قاتەرلى ىسىگىنە، ينفاركت جانە ينسۋلتكە شالدىقتىراتىنى جايلى ءجيى ەستيمىز. ءبىراق توقتاۋسىز داميتىن وكپەنىڭ سوزىلمالى وبسترۋكتيۆتى اۋرۋىنا (ءوسوا) ءمان بەرە بەرمەيمىز.
شىلىمقورلارلاردىڭ 90%-عا جۋىعى كۇن سايىن ورتا ەسەپپەن 11–12 تال تەمەكى شەگەدى. بۇل دەرەك تەمەكى شەگۋدىڭ دەنساۋلىققا ءتوندىرىپ وتىرعان ۇلكەن ءقاۋىپ ەكەنىن كورسەتەدى.
«وكپەنىڭ سوزىلمالى وبسترۋكتيۆتى اۋرۋى – بۇل تىنىس الۋ جۇيەسىنىڭ سوزىلمالى قابىنۋى. وندا تىنىس جولدارى تارىلىپ، وكپە ءتىنى بۇزىلادى. اۋرۋ بىرتىندەپ داميدى جانە ۇزاق ۋاقىت بويى بايقالماۋى مۇمكىن. بۇل كەسەل ەكى نەگىزگى جاعدايدى قامتيدى: سوزىلمالى برونحيت – قاقىرىقتى تۇراقتى جوتەل جانە وكپە ەمفيزەماسى، ياعني الۆەول قابىرعالارىنىڭ بۇزىلۋى. ەكى جاعداي دا تىنىس الۋ قيىنداپ، اعزادا وتتەگى جەتىسپەۋشىلىگى بايقالادى»، – دەيدى كارديولوگيا جانە ىشكى اۋرۋلار عزي №2 تەراپيا بولىمشەسىنىڭ پۋلمونولوگ دارىگەرى ايدا ءجادىل.
دارىگەر ءوسوا-نىڭ العاشقى بەلگىلەرى بايقالماۋى مۇمكىن، ءبىراق تومەندەگىلەرگە نازار اۋدارۋ قاجەت دەيدى.
– 3 ايدان استام ۋاقىتقا سوزىلاتىن سوزىلمالى جوتەل، اسىرەسە تاڭەرتەڭگى؛
– قاقىرىقتىڭ ءبولىنۋى (كوبىنە ءتۇسسىز، ءبىراق ءورشۋ كەزىندە سارى نەمەسە جاسىل تۇسكە اينالۋى مۇمكىن)؛
– دەمىگۋ فيزيكالىق كۇش تۇسكەندە (مىسالى، باسپالداقپەن كوتەرىلگەندە).
اۋرۋ اسقىنعان سايىن ادامعا تىنىس الۋ ءتىپتى تىنىشتىقتا دا قيىنعا سوعادى.
ءوسوا-نى تولىق ەمدەۋ مۇمكىن ەمەس. ءبىراق تەمەكىنى تاستاۋ – اۋرۋدىڭ دامۋىن باياۋلاتاتىن شەشۋشى قادام؛ دارى-دارمەك تەراپياسى اۋرۋ بەلگىلەرىن باقىلاۋدا ۇستاۋعا كومەكتەسەدى؛ تىنىس الۋ جاتتىعۋلارى، دۇرىس تاماقتانۋ جانە ۆاكسيناسيا (مىسالى، تۇماۋ مەن پنيەۆموكوككقا قارسى) ءومىر ساپاسىن ايتارلىقتاي جاقسارتادى.
«اۋىر جاعدايلاردا وتتەگى تەراپياسى نەمەسە حيرۋرگيالىق ەم تاعايىندالادى. دسۇ دەرەگىنە سۇيەنسەك، ءوسوا – الەم بويىنشا ءولىم-جىتىم سەبەپتەرىنىڭ ىشىندە ءۇشىنشى ورىندا. ناۋقاستاردىڭ كوبى دياگنوزدى تىم كەش بىلەدى – وكپەدەگى وزگەرىستەر قايتىمسىز كەزەڭدە انىقتالادى. دەگەنمەن، تەمەكىنى كەز كەلگەن كەزەڭدە تاستاۋ اۋرۋدىڭ بولجامىن ەداۋىر جاقسارتا الادى»، – دەيدى پۋلمونولوگ ايدا ءجادىل.