الماتى كىتاپحانا سالاسىنا يننوۆاسيالىق شەشىمدەردى بەلسەندى ەنگىزۋدى جالعاستىرۋدا.
مەگاپوليستىڭ قوعامدىق ورىندارىندا العاش رەت كىتاپ بەرۋگە ارنالعان زاماناۋي اۆتوماتتار ورناتىلدى، دەپ حابارلايدى aqshamnews.kz.
وكق بريفينگىندە «الماتى قالاسىنىڭ ورتالىقتاندىرىلعان كىتاپحانا جۇيەسىنىڭ» ديرەكتورى مەيرام بەكتەمبايەۆ ايتقانداي، وسىنداي 24 دەربەس كىتاپحانا توعىز مەترو ستانسياسىندا پايدا بولدى: «رايىمبەك باتىر»، «جىبەك جولى»، «المالى»، «اباي»، «بايقوڭىر»، «مۇحتار اۋەزوۆ»، «الاتاۋ»، «سايران»، «ماسكەۋ»، سونداي-اق، مەدەۋ جانە اۋەزوۆ اۋداندارىنىڭ حقكو-لارىندا، «سپۋتنيك»، «اتاكەنت»، «ازيا پارك» ساۋدا ورتالىقتارىندا، مەدەۋ جانە تۇركسىب اۋداندارىنىڭ جاستار كوميۋنيتي-ورتالىقتارىندا جانە Sail كوۆوركينگىندە.
«وسى اۆتوماتتاردىڭ كومەگىمەن وقىرماندار ءداستۇرلى كىتاپحاناعا بارماي-اق كىتاپتاردى تاڭداپ، الا الادى، سونداي-اق ادەبيەتتەردى 24 اۆتوماتتىڭ كەز كەلگەنىنە نەمەسە قالالىق كىتاپحانالار فيليالىنا قايتارا الادى. ول ءۇشىن وقىرمان بيلەتى بولۋى كەرەك. ەگەر ول بولماسا، تىركەۋدەن ءوتىپ، «قالا وقىرماندارى كلۋبىنا قوسىلۋعا» بولادى. ارنايى بۇل ءۇشىن اپپاراتتاردىڭ جانىندا بارلىق تىركەلگىسى كەلگەن وقىرمانداردى تىركەپ، بيلەت بەرە الاتىن كىتاپحانا قىزمەتكەرلەرى ۋاقىتشا جۇمىس ىستەيتىن بولادى»، – دەدى سپيكەر.
سونداي-اق، ءاربىر كىتاپ العىسى كەلگەن ادام «الماتى كىتاپحانالارىنىڭ» 30 فيليالىنىڭ بىرىنەن وقىرمان بيلەتىن الا الادى، ونىڭ ۇشەۋى تاۋلىك بويى جۇمىس ىستەيدى. وسىدان كەيىن كىتاپسۇيەر وقىرمان اۆتوماتتى ءوز بەتىنشە پايدالانا الادى نەمەسە almatylibrary.kz سايتىندا ءوز بەتىنشە تىركەلىپ، قاجەتتى كىتاپتارعا تاپسىرىس بەرىپ نەمەسە ولاردى ونلاين رەجيمىندە رەزەرۆكە قويا الادى. كىتاپ الۋشىلار اراسىندا ونى قايتارۋ مەرزىمى اۆتوماتتى تۇردە ەسەپكە الۋ ءۇشىن قاداعالاۋ جۇيەسى ەنگىزىلگەن. بۇل تۋرالى وڭىرلىك كوممۋنيكاسيالار قىزمەتى الاڭىندا قازاقستان جازۋشىلار كىتاپحاناسىنىڭ جەتەكشىسى ماقپال مۇحاممەدوۆا حابارلادى.
مارجان مۇحاممەدوۆا سوزىنە سۇيەنسەك الماتى مادەنيەت باسقارماسىنا قاراستى كىتاپحانالاردىڭ بارلىق جۇمىسى اۆتوماتتاندىرىلعان. 1،3 ميلليوننان استام كىتاپتى قۇرايتىن بۇكىل كىتاپ قورىنىڭ ءبىرىڭعاي ەسەبى قۇرىلدى. قىزمەتكەرلەر ەلەكتروندى كاتالوگ جۇرگىزەدى، ادەبيەتتەردىڭ كىمنىڭ قولىندا ەكەنىن يجەدەل قاداعالايدى، بۇل قىزمەت كورسەتۋدى ەداۋىر جىلدامداتادى. كىتاپتار مەن ولاردىڭ قول جەتىمدىلىگى تۋرالى بارلىق اقپارات ءبىرىڭعاي مالىمەتتەر بازاسىنان الۋعا بولادى، ال قورلاردى پايدالانۋ ستاتيستيكاسى قىزمەتكەرلەرگە ادەبيەتكە دەگەن سۇرانىسقا تالداۋ جاساۋعا كومەكتەسەدى.
ايتقانداي، 2024 جىلى قالالىق كىتاپحانالارعا 3 ميلليوننان استام كەلۋشىلەر تىركەلگەن. ايتا كەتەيىك، قالا كىتاپحانالارىنىڭ 95% - ى جاڭعىرتىلعان. ءار كىتاپحانادا جيھاز جانە ماتەريالدىق-تەحنيكالىق بازا جاڭارتىلدى، ينتەرنەتكە قولجەتىمدىلىك قامتاماسىز ەتىلدى، سونداي-اق الەمدىك ستاندارتتارعا سايكەس شەشىمدەر ەنگىزىلدى