الماتىدا ەستۋ جانە كورۋ قابىلەتى بۇزىلعان ادامدارعا جەتى كىتاپحانا قىزمەت كورسەتەدى.
ولاردىڭ اقپاراتقا ىڭعايلى قول جەتكىزۋى ءۇشىن زاماناۋي جابدىقتارمەن قامتاماسىز ەتىلگەن. وڭىرلىك كوممۋنيكاسيالار قىزمەتىنىڭ بريفينگىندە اتقارىلعان جۇمىستار مەن دامۋ پەرسپەكتيۆالارى تۋرالى «الماتى قالاسىنىڭ ورتالىقتاندىرىلعان كىتاپحانا جۇيەسىنىڭ» ديرەكتورى مەيرام بەكتەمبايەۆ ايتىپ بەردى.
«بۇل كىتاپحانالاردا ءماتىندى تاكتيلدى فورماتتا شىعاراتىن برايل ديسپلەيلەرى، برايل باسىپ شىعارۋعا ارنالعان پرينتەرلەر، ءماتىننىڭ كونتراستىن ۇلكەيتۋگە جانە وزگەرتۋگە ارنالعان قۇرىلعىلار جانە ءماتىندى وقيتىن، ونى داۋىستاپ ويناتاتىن جانە اۋديو فورماتقا اۋداراتىن سكانەرلەر بار»، – دەدى ول.
اۋديوكىتاپتاردى تىڭداۋ ىڭعايلى بولۋ ءۇشىن كىتاپحانالاردا دىبىس ساپاسى جوعارى قۇلاققاپتار دا بار. سونىمەن قاتار، بەيىمدەلگەن باعدارلامالىق جاساقتاماسى بار كومپيۋتەرلەر ورناتىلعان، بۇل كورۋ جانە ەستۋ قابىلەتى ناشار ادامدارعا اقپاراتپەن ءتيىمدى جۇمىس ىستەۋگە كومەكتەسەدى.
ەستۋ جانە كورۋ قابىلەتى بۇزىلعان ادامدار كەلەسى كىتاپحانالارعا بارا الادى: جامبىل اتىنداعى قجك، «Alatau Creative Hub»، چەحوۆ اتىنداعى وقك، قازاقستان جازۋشىلارىنىڭ كىتاپحاناسى، سونداي-اق رەسۋرستاردى پايدالانۋ كەزىندە ولاردىڭ ىڭعايلىلىعى مەن جايلىلىعى ءۇشىن بارلىق جاعدايلار جاسالعان №4، 14 جانە 45 فيليالدار. باستاما الماتى اكىمىنىڭ تاپسىرماسى بويىنشا مادەني نىساندارعا تەڭ قول جەتكىزۋ جانە كەدەرگىسىز ورتا قۇرۋ قاعيداتى شەڭبەرىندە ىسكە اسىرىلدى.
ايتا كەتەيىك، بۇل كىتاپحانالاردا كورۋ قابىلەتى ناشار قىزمەتكەرلەر جۇمىس ىستەيدى جانە وقىرماندارعا جابدىقتى يگەرۋگە، قاجەتتى رەسۋرستاردى ىزدەۋگە جانە وقۋعا كومەك كورسەتەدى. بۇل جۇمىس ورىندارىن قۇرۋعا جانە قالانىڭ بارلىق تۇرعىندارى ءۇشىن مادەنيەت پەن بىلىمگە قول جەتىمدىلىكتىڭ قوسىمشا مۇمكىندىكتەرىن جاساۋعا مۇمكىندىك بەرەدى.
جالپى، قالادا اكىمدىك جانىنان 30-عا جۋىق كىتاپحانا جۇمىس ىستەيدى جانە ونىڭ 95% - ى جاڭعىرتىلعان. جىل سايىن الماتى كىتاپحانالارىنا باراتىنداردىڭ جالپى سانى 3 ميلليوننان اسادى.