جول قوزعالىسىنا وزگەرىستەر ەنگىزىلگەن.
الماتىدا قوعامدىق كولىك جولاقتارىنداعى جول قوزعالىسىندا وزگەرىس ەنگىزىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
"كريس پي الماتى/كازپرەسس.كز" تەلەگرام ارناسىندا «رايىمبەك باتىر داڭعىلىنداعى اۆتوبۋس جولاعىندا باسقا دا اۆتوكولىكتەرگە جۇرۋگە رۇقسات ەتىلدى» دەگەن اقپارات تاراعان بولاتىن. وسىعان وراي، قازاقپارات ءتىلشىسى الماتى قالاسىنىڭ موبيلدىلىك باسقارماسىنا رەسمي ساۋال جولداعان ەدى.
باسقارمانىڭ جاۋابىنا سايكەس، الماتى قالاسىنىڭ رايىمبەك باتىر داڭعىلى بويىندا (ساين كوشەسىنەن ياسساۋي كوشەسى ارالىعى) قوعامدىق كولىك جولاقتارىنداعى جول قوزعالىسىنا وزگەرىستەر ەنگىزىلگەن.
«بۇل 5.9 «مارشرۋتتىق كولىك قۇرالدارىنا ارنالعان جولاق» جول بەلگىسىنە قوسىمشا 7.5.6 «قولدانىلۋ ۋاقىتى» (7:30-9:30 جانە 17:00-20:00) اقپارات بەلگىسىن (تاقتايشا) ورناتۋ ارقىلى جانە فوتو-بەينەتىركەۋ كامەرالارىن قايتا باپتاۋ ارقىلى ىسكە استى. ايتا كەتەيىك، بۇل وزگەرىس ق ر پرەزيدەنتىنىڭ 2021 جىلدىڭ ءساۋىر ايىنداعى «قالالار ىشىندە اۆتوكولىك اعىنىن ءتيىمدى قۇرۋ جونىندە شارالار قابىلداۋ تۋرالى» تاپسىرماسى مەن دەمالىس كۇندەرى جانە «پيك ساعاتىنان تىس» ارنايى بولىنگەن اۆتوبۋس جولاقتارىن پايدالانۋ ماسەلەسىن شەشۋ اياسىندا ورىندالدى»، - دەلىنەدى باسقارما حابارلاماسىندا.
سونداي-اق، باسقارمادان بۇل جوبا پيلوتتىق رەجيمدە العاش رەت جاسالىپ تۇرعانىن حابارلادى.